Tetun: MOP LANSA FATUK DAHULUK BA PROJETU DADA ELETRISIDADE BA SUKU RAIROBO

RAIROBO, 27 MAIU 2021: S. Exa, Ministru Obras Públikas (MOP), Arq. Salvador Eugénio Soares dos Reis Pires, akompaña husi Prezidente Eletrisidade Timor-Leste (EDTL,E. P) lansa fatuk dahuluk ba projetu konstrusaun liña distribuisaun enérjia eletrisidade Baixa no Media Tensaun ba suku Rairobo, postu administrativu Atabae, munisípiu Bobonaro. “Ha’u mai lori S. Exa, Sr. Primeiru Ministru (S. Exa, PM, Sr. Taur Matan Ruak) nia naran no Governu tomak ami mai iha loron di’ak ida-ne’e, iha biban ida-ne’e ita komesa lansa projetu eletrifikasaun nasionál ba suku sira seidauk asesu ba liña eletrisidade iha teritóriu tomak, 76 suku ne’ebé seidauk asesu eletrisidade. Grasa Maromak nian, Rairobo mak hanesan fatin primeiru hetan projetu ne’ebé ita lansa kedas iha 2019 liga mós tamba ho COVID-19, momentu ne’eba iha Konsellu Ministru iha diskusaun buka hela infraestrutura atu halo konfinamentu no izolamentu, ida mak ita-nia postu UPF nian 500 kama mak iha ne’e, maibé ha’u dehan ba S. Exa, Primeiru Ministru katak iha ne’eba eletrisidade laiha, see aban bainrua uza ida-ne’e ita tenke lori uluk eletrisidade ba uluk Rairobo, see ita uza jeradór de’it sei la sufisiente, nusa ita la buka meus para halo uluk projetu eletrifikasaun ba iha ne’eba, entaun ha’u ko’alia ho Sr. Ministru Defeza iha momentu ne’eba hanesan Ministru Interiór interinu, sira halo pedidu ida para lori ba aprezenta iha Konsellu Ministru no KAFI no hetan aprovasaun ita lansa tender no ohin ita mobiliza halo projetu eletrifikasaun ida-ne’e,”Sr. Ministru Obras Públikas informa ba komunidade Rairobo bainhira halo lansamentu fatuk dahuluk ba projetu konstrusaun liña distribuisaun enérjia eletrisidade ba suku Rairobo, iha suku Rairobo, postu Atabae, munisípiu Bobonaro. Projetu konstrusaun ba liña eletrisidade ne’e hala’o husi kompañia Esmelia II Electric, Unip.Lda, hahú iha loron 2 fulan-Maiu tinan 2021 no sei remata iha loron 02 fulan-Dezembru tinan 2021, ho montante orsamentu US $411, 806. 78. Sr. Ministru hatete, "Projetu ne’e sei la’o tan fulan rua ka fulan tolu para atu halo kompleta projetu ne’e. espera katak sira (kompañia-red) bele fó sira-nia abilidade tomak hala’o projetu ne’e ho kualidade tanba projetu ne’e projetu ba povu, utiliza osan povu nian hala’o ho kualidade nune’e bele lori fali retornu ekonómiku tuir ita-nia vizaun ne’ebé iha, sustentabilidade ekonómiku no dezenvolvimentu ekonómiku país nian". Hanesan Atabae oan, iha oportunidade ne’e, Sr. Ministru Obras Públikas husu ba autoridade seguransa, autoridade lokál, veteranus no komunidade atu kontribui realizasaun projetu ida-ne’e ho di’ak, atu nune’e bele fó naromak ba komunidade Rairobo. “Ha’u husu mós ba ita-nia autoridade lokál, komunidade, ita-nia aman veteranu sira, autoridade seguransa, atu servisu hamutuk suporta projetu eletrifikasaun ne’e,”Sr. Ministru husu. Iha oportunidade ne’e, Sr. Ministru aprezenta ba komunidade kona-ba planu no programa Governu nian iha área estrada, eletrisidade no bee-moos ne’ebé planeadu ona iha Orsamentu Jerál Estadu tinan fiskál 2021 nian, inklui programa sira ne’ebé presiza halo iha futuru. Governu kontinua halo esforsu dada eletrisidade ba komunidade, halo manutensaun no rehabilitasaun estrada no dada bee-moos ba komunidade inklui atendimentu Governu nian iha área sira seluk maibé servisu sira ne’e hotu realiza bainhira iha rekursu finanseiru, nune’e, ho limitasaun rekursu ne’ebé iha Governu sei esforsu atende preokupasaun sira ne’ebé nesesáriu no importante liu ida por ida to’o hotu. Iha fatin hanesan, Prezidente EDTL,E.P, Sr. Paulo da Silva mós informa kona-ba polítika no programa EDTL nian hanesan Empreza Públika ba komunidade Rairobo iha área eletrifikasaun nasionál no liuliu oinsá EDTL bele buka osan rasik ba nia sustentabilidade iha futuru. Prezidente Autoridade Munisipál munisípiu Bobonaro, Sr. Zeferino dos Santos, Administradór postu administrativu Atabae, Sr. Pedro Lakubuti, informa ba Sr. Ministru kona-ba preokupasaun komunidade munisípiu Bobonaro nian iha área oioin liuliu iha postu administrativu Atabae nian, nune’e Governu bele atende preokupasaun sira ne’e. Serimonia Lansamentu ne'e, partisipa husi Prezidente Autoridade Munisipál munisípiu Bobonaro, Zeferino dos Santos, Administradór postu administrativu Atabae, Pedro Lakubuti, Autoridade Seguransa no Defeza iha munisípiu Bobonaro nian, inklui Autoridade Lokál no komunidade Rairobo.

Asiste mós husi Diretór Jerál Administrasaun no Finansas (DJAF), Sr. Januário Barbosa, Prezidente Institutu Jestaun Ekipamentus (IJE), Sra. Hermenegilda D C. Laurentina, Prezidente Autoridade Nasionál Eletrisidade (ANE), Sr. Ruben Jerónimo Freitas, no tékniku sira.