Weer
Et weer is de toestaand van 'e atmosfeer van een planeet, zoas hoe hiete of kold as et is, hoe nat of dreuge, hoe wiendstille of stormachtig, hoe helder of bewolkt. Op Eerde speulen de mieste weersaktiviteiten heur of in de onderste laoge van 'e daampkring (de atmosfeer van 'e Eerde), naemelik in 'e troposfeer, krek onder 'e stratosfeer. Intied dat et weer verwis naor de temperatuur, neerslag en aandere omstaandigheden van 'e daampkring, gaot et klimaot over 'e gemiddelde atmosferische omstaandigheden over langere periodes (miestal wodt d'r naor dartig jaor ekeken).
Weer wodt bepaold deur plaeselike verschillen in lochtdrok, temperatuur en vochtigheid. Zokke verschillen kunnen et gevolg wezen van de staand van de zunne op een bepaolde plekke, wat per briedtegraod verschilt. Op meer noordelike briedtegraoden schient de zunne vanuut een legere hoek, dichter bi'j de horizon. Daordeur wodt de energie van et zunlocht over een groter gebied verspreid en is disse energie zwakker as dichter bi'j de evenaar, waor de zunne meer van bovenof schient en de energie dus op een kleiner gebied ekoncentreerd is. Verschillen in temperatuur brengen op heur beurte verschillen in lochtdrok teweeg.
|
Dit stok is eschreven in et Stellingwarfs van de Kop van Overiessel. |
