Ralls Janet

Ralls Janet, Ralls Genet oder eenfach Ralls is en Soort vun’n Huusappel, de wohrschienlich al vör 1800 as Tofallssamling opkamen is. De Soort is noch ünner tallrieke annere Synonymen bekannt.

Dat warrt vermood, dat de Naam Genet vun Edmond-Charles Genêt afleidt is. Dat weer en franzööschen Bottschopper in de USA wiel de franzööschen Revolutschoon. De Pomoloog Spencer A. Beach schall 1905 över disse Soort schreven hebben, dat se al mehr as hunnert Johren vörher to’n eersten mol bi M. Caleb Ralls in Amherst in Virginia sehn worrn is.

Beschrieven

De Ralls entwickelt dörsnittlich kräftige Bööm, mit apene wiete Twiegen. De Boom bruukt nich veel Pleeg, is aver anfallig för Appelschorf un Anthraknoos.

De Appel sülvst is vun middlere Grött mit en runne Form, de an de Ennen afplatt is. De Sluut is gröön-geel un kann vele verschedene Musters vun Rosa, Root oder Purpur över mehr as de halve Böverflach opwiesen. Opfallige gele, rootgele un witte Punkten künnt op de helen Frucht vörkamen. Dat Fruchtfleesch is geel mit en lichten Toon in’t Gröne. Dat Fleesch is bito saftig, knackig un hett en sööt-suren Smack. Bi’t Snieden verbreedt sik en sööt Aroma. De Appel warrt in de eersten Oktoberweek riep un lett sik goot lagern.

Kiek ok

List vun de Appelsorten

Weblenken