Lufsig
Lufsig（字體設計LUFSIG，中國大陸譯名：路福西，原譯路姆西）係一款德國設計師Silke Leffler設計嘅毛公仔，響宜家家居有得賣。
造形
[編輯]Lufsig造形係一隻狼抱著一個婆婆，小朋友可以由狼肚入面救返出婆婆[1][2]，靈感嚟自童話故仔《小紅帽》嘅大豺狼。
為咗配合宜家家居「毛公仔助學行動」，宜家家居將Lufsig嘅性格設定做怕醜仔，家境窮但好學，每天一早起身幫人派牛奶同報紙，希望可以去返學學多啲嘢。而佢手抱嘅婆婆係位充滿智慧嘅老師，經常響課堂提問，等學生由遊戲度學識諗嘢[3]。
名
[編輯]Lufsig係瑞典文，瑞典宜家家居官方講法話係「伐木」（英文：to lumber）咁解[4]，亦有人覺得係有笨手笨腳、論論盡盡（英文：clumsy）嘅意思[5]。
Lufsig響兩岸三地嘅宜家家居都有得賣，香港同台灣都直接用返原名，而中國大陸就跟北方話音譯，原先譯做「路姆西」，後來改名做「路福西」。
風行香港
[編輯]2013年11月開始，宜家家居喺全世界搞「毛公仔助學行動」，義賣Lufsig同其他毛公仔，本來唔係好多香港人留意。但到12月7號，香港社民連兩位成員向行政長官梁振英抗議嗰陣，除咗丟雞蛋之外，亦有丟Lufsig，因為Lufsig個大陸譯名「路姆西」同粵語粗口「老母屄」接近，夾埋「丟」呢個動作，諧音就係「屌你老母屄」。加上一直都有人將梁振英比喻做狼，所以成功引起唔少香港人留意。
喺網上廣泛討論同傳媒廣泛報道之下，好多香港人都湧到宜家家居搶購Lufsig，唔使3日時間就賣斷市，當中部份人更將佢用炒高嚟賣，甚至連大陸嘅深圳分舖同廣州分舖都賣清嗮。亦有一啲香港出名嘅人趁熱鬧同Lufsig一齊影相[6][7][8]。
隨後，梁振英本人亦同Lufsig合照，重開埋網誌「與狼共桌」，話讚賞銷售商搞助學籌款，又盛讚香港人有創意，重送咗個Lufsig畀個女做聖誕禮物[9]。
另外，喺中國大陸，有個商人喺路姆西搶購潮後冇幾耐，推出咗五款路姆西手機殼，多種手機版本都有[10]。
遊戲
[編輯]有網民整咗「CY大戰路姆西」遊戲，等廣大網民可以玩鋪勁，面世一日成為網民追捧嘅電子遊戲。玩法同經典遊戲食鬼相似，玩家可以用CY食伯母同可反食路姆西，分數高可以登上狼虎榜。俾香港《蘋果日報》等傳媒報導之後，流量又再升，玩家數目超過五萬[11][12][13]。
改名
[編輯]事件發生之後，宜家宣布將Lufsig大陸譯名改成「路福西」。宜家總部發言人對事件表示遺憾，但聲稱唔會撤回產品。不過又有人再將福同fuck聯繫起身[14]。
參考
[編輯]- ↑ 〈IKEA宜家家居線上購物，給你更多居家佈置靈感 - IKEA〉。www.ikea.com (臺灣中文)。原著喺2013-12-12歸檔。喺2018-11-27搵到。
- ↑ 〈LUFSIG 填充玩具〉。IKEA (臺灣中文)。原著喺2020-03-15歸檔。喺2018-11-27搵到。
{{cite web}}: Cite has empty unknown parameter:|dead-url=(help) - ↑ 〈路姆西揚威家鄉 瑞典傳媒：反政府象徵〉。《主場新聞》。2013-12-16。原著喺2013-12-16歸檔。喺2018-11-27搵到。
{{cite web}}: Cite has empty unknown parameter:|dead-url=(help) - ↑ 〈野狼軟玩具在香港突然紅起來〉。《BBC中文網》 (繁體中文)。喺2018-11-27搵到。
{{cite web}}: Cite has empty unknown parameter:|dead-url=(help) - ↑ 〈【網民hottalk】「路姆西」大熱凌晨忽然下架〉。《香港蘋果日報》。原著喺2016-03-05歸檔。喺2018-11-27搵到。
{{cite web}}: Cite has empty unknown parameter:|dead-url=(help) - ↑ 〈宜家路姆西被搶購一空〉。原著喺2013-12-16歸檔。喺2013-12-11搵到。
- ↑ 〈一掟變潮物 全城搶購路姆西〉。AM730。原著喺2013-12-12歸檔。喺2018-11-27搵到。
{{cite web}}: Cite has empty unknown parameter:|dead-url=(help) - ↑ 〈宜家賣哂路姆西〉。原著喺2014-06-06歸檔。喺2013-12-11搵到。
- ↑ 〈與狼共桌〉。2013-12-11。原著喺2013-12-13歸檔。喺2013-12-12搵到。
- ↑ 〈中華強國創奇迹 即售LUFSIG手機殼〉。原著喺2013年12月16號歸檔。喺2015年1月7號搵到。
- ↑ 〈CY大戰路姆西 食鬼遊戲網上熱爆〉。2013-12-14。原著喺2013-12-15歸檔。喺2013-12-15搵到。
- ↑ 〈網上遊戲CY大戰路姆西〉。2013-12-14。原著喺2014-12-17歸檔。喺2021-06-23搵到。
- ↑ 〈12月網上熱爆遊戲 ♣「CY大戰路姆西」♣ 齊來成為路姆西達人〉。2013-12-15。
- ↑ 〈LUFSIG急改名「路福西」 瑞典宜家：抱歉〉。AM730。2013-12-12。原著喺2013-12-15歸檔。喺2013-12-12搵到。
睼埋
[編輯]連出去
[編輯]
