方言

  想搵第二個意思嘅話，請睇方言 (搞清楚)。

方言係一個語言學術語，英文係Dialect。方言分兩種，一種叫「地域方言」，另一種叫「社會方言」。地域方言(regional dialect)係語言嘅地域變體，多數嚟講地域方言係因為大規模移民之後，久而久之演變出嚟。而社會方言(Sociolect 或 Social Dialect)係語言嘅社會變體，同一種話因為唔同人嘅職業、階層、年紀、性別差異，而喺講嘢嘅口音、措詞、言談之間會有唔同，例如上流社會同低下層社會嘅人講嘢就有唔同。社會方言之下又有所謂個人方言（idiolect），即係每個人講嘢自己嘅特點。

「方言」相對「語言」

通常任何有語言差異嘅社會，基本上每個人講嘢都係講方言，方言相對於語言嚟講，語言屬於一個抽象觀念，因為實際上每個人講嘢都係講方言而唔係講語言。對於語言一個比較實在啲嘅理解，可以講成「民族共同語」或者「民族語言」，即係指一個民族講嘢嘅大圍基礎。例如中國嘅民族共同語就係普通話，但實際上唔同地方嘅人講普通話都帶有方言嘅特性，就算係以標準普通話，即北京話嚟計，佢本身亦係一種地域方言，所以民族共同語其實本身都係以某一種方言作為基礎，所以又有分非基礎方言同基礎方言，但兩種嘢之間都有好多相通。