玉郎漫畫
玉郎漫畫係一本香港公仔書，喺1984年九月創刊，係雙週刊形式咁隔個禮拜五晚出版，由漫畫報演變出嚟嘅一本綜合漫畫雜誌；本嘢由當時玉郎集團嘅總監祁文傑監制，走輕鬆搞笑路線，內容乜都有，除咗主打嘅漫畫之外，重有明星專訪同娛樂新聞…等。
可惜喺1987年，上咗市嘅玉郎集團因為股災加上漫畫潮崩潰而陷入財政危機，後來集團老闆黃玉郎更因為喺1987年至1989年期間涉及商業犯罪而接受調查，終於喺1990年俾星島報業集團大幅收購，於是玉郎集團出版公司就正式改咗名做文化傳信，而哩本綜合漫畫書亦就此停刊。
主打單元
明星專訪
每期會由玉郎集團嘅老闆黃玉郎親自出馬訪問一啲當時得令嘅歌影視藝人，訪問內容嘅旁邊會加上佢哋設計出嚟嘅動作相片，加上自己畫嘅插畫用連環圖嘅方式刊登出嚟；有時仲會喺張相上面加工，例如加滴汗，加啲淚水，畫啲嘢落去令到張插圖更加惹笑，增加讀者睇嘅趣味。
玉郎劇場
由綽號「興豬」嘅漫畫家黃國興繪畫，主要係將電影、電視…嘅故事改編成搞笑故事，例如當年無綫電視嘅一套學警故事，由初出道嘅梁朝偉做主角嘅《新紥師兄》就俾佢改篇成為咗「雞紥師兄」，極盡玩嘢之能事，可以話係【玉郎漫畫】嘅主打重頭戲之一。睇返通常玉郎劇場原來係會同嗰期嘅封面對應，即係如果嗰期取材啲咩嘢做封面構圖，咁嗰期嘅玉郎劇場就係改篇嗰啲嘢嘅故事，好似上面話用《新紥師兄》做咗改篇題材，嗰期嘅封面佢就畫咗一個著住警察制服個樣戇戇直直嘅漫畫梁朝偉對住漫畫黃玉郎敬禮，十分可愛搞笑。通常玉郎漫畫嘅封面都係由畫風生鬼兼像真嘅漫畫家阮大勇負責繪畫。
太公報
由甘小文製作，模仿報紙形式刊載嘅專欄，通常誇頁咁得兩版紙一面睇哂；入面有插圖有文字，內容極盡無厘頭兼夾粗俗，隨時係屎尿屁乜都出齊嗰隻。
最令人難忘嘅係佢對於香港粗口文化有住超多嘅創作意念，最鍾意用啲粗口字嚟玩諧音，又鐘意借用被譽為「廟街歌王」尹光啲首本名曲嘅歌名嚟做題材玩嘢，好似週不時教人《數毛毛》，《數波波》，扮吓《相士大隻西》教人睇相…等；佢仲成日拎自己或者其他人嘅相片，又或者工作上嘅生活照嚟玩，好似佢會將公司聯歡聚餐嘅相整成連環圖咁，再喺啲人上面加上一舊舊嘅發言框（多數搵佢老闆黃玉郎嚟玩），然後改篇哂做笑料對白，配合埋當時相中人嘅動作同埋加咗工嘅表情，真係睇到攬住個肚大笑；有一個人嘅大頭証件相片次次都俾佢加工變成唔同嘅形像，有時光頭款，有時流口水，有時眼矇矇…，總之要整到哩個稱為「陳卓球」，又叫「咸球」嘅角色極盡搞笑頂癮先收科。
除此之外，喺佢筆下嘅主要人物都可以話係影射加上醜化嘅佼佼者，出哂名嘅有以下哩幾個：
- 留住兩邊師爺鬚，戴住副圈圈眼鏡嘅「矇眼堅」、
- 塊面四四方方加副圓圓眼鏡，眼仔咪成兩條線咁嘅茂李「四方果」、
- 鬈毛剷青頭兼且面形倒三角，鼻兩邊幾條毛毛成隻老鼠咁款嘅「老鼠龍」、
- 著舊式婆仔衫，肥肥腫腫兼講嘢大大聲嘅「肥婆四」，
- 與及肥婆四嘅好姊妹，瘦瘦長長生得一對大哨牙嘅「哨牙珍」，
- 唔可以唔提嗰個到咗今時今日仲仍然會喺甘小文筆下嘅報紙漫畫專欄出現嘅主角，成個人黑過墨汁剩係見到對眼同個口，據聞係來自非洲嘅「黑鬼德」…等；
睇住哩堆漫畫活寶貝成日喺紙上面諷刺時弊，夾住粗口諧音講哩講路，再加上其它似是而非、俗得嚟又好似有啲意思、鹹濕得嚟又隱隱晦晦要意會嘅內容，成為咗當時睇【玉郎漫畫】嘅趣味重點之一；不過到咗今時今日仲為人津津樂道嘅嘢，都莫過於佢嘅「看圖識字」囉～
情若無花不結果
由狄克編繪，每期都會用細膩嘅筆觸勾畫出一段段有笑有淚嘅愛情故事，屬於每期完嘅獨立式單元故事。
其他主要主筆
