Wikipedia:收錄指引

喺維基百科，決定一個話題值唔值得獨立成文嘅原則叫做notability(英文)或者關注度(中文)。呢個原則係咁寫嘅：

如果有足夠嘅獨立、可靠嘅第二方來源記載個話題，咁呢個話題就可以收錄。

亦即係話，如果一個話題符合以下兩個原則：

1. 有可靠、獨立、足夠嘅資訊來源；同埋
2. 《唔啱維基百科嘅嘢》政策冇將佢排除在外；

噉一個話題就可以獨立成篇。

實際執行方面，考慮到粵文維基百科喺咁多唔同語文嘅維基百科版本之間唔算大，所以執行收錄指引大致睇以下幾點：

• 篇文有引用獨立、可靠嘅來源，就可以收錄。
• 篇文有連去其他維基百科語言版本上面，講相同話題嘅文，而呢個話題喺嗰個版本已經過咗 notability 測試，尤其係英文或者中文版，亦可以收錄。
• 同粵語、粵地文化（兩廣、港澳、南洋粵人、海外粵人）關係特別密切嘅話題，有時會酌情從寛處理。
• 如果題材係事件或者人，篇文引用嘅來源唔一定要跨越好長時間；夠可靠支持文章內容就得。呢方面粵文維基百科喺執行細節上同英文版唔同。
• 至於其他細節，如果粵文維基百科無本地共識，一般參考英文或者中文維基百科。

要留意嘅係，notability並唔係名氣、重要性、或者廣泛性，雖則出名、重要嘅話題好大機會過到 notability。Notability 講嘅係維基百科嘅資料一定要查證得到；如果無可靠嘅獨立來源，就唔應該畀佢獨立成文。維基百科對notability嘅概念，就係利用呢一個基本水平，去避免乜都收一餐嘅情況。文章或者一覽表一定要係 notable，或者係「值得留意」。

呢啲指引只係畫出一個話題獨立成篇嘅恰當性，但並唔局限文章或者一覽表入面嘅內容。要知維基百科有關內容嘅政策，睇中立觀點、查證得到、歸屬、維基百科唔係，同埋生人傳記。而即使一個話題夠 notable，編輯者亦可以自己決定將相關嘅話題合成一篇文。

參考

• en:Wikipedia:Notability
• zh:維基百科:關注度