KV56
| KV56 | ||
| Grafkelder van 'n kind of koningin | ||
| ||
| Goue oorringe uit KV56. | ||
| Ligging | Vallei van die Konings | |
| Land |  Egipte
| |
| Ontdek | 5 Januarie 1908 | |
| Uitgrawings deur | Edward R. Ayrton (1908) Nicholas Reeves (1998-2002) | |
← Vorige KV55 Volgende →
KV57 | ||
KV56, ook bekend as die Goue Grafkelder, is 'n grafkelder in die Vallei van die Konings by Thebe, naby die moderne stad Luxor in Egipte. Dit is in Januarie 1908 deur Edward R. Ayrton ontdek en het vermoedelik die ongeskonde liggaam van 'n koninklike kind uit die laat 19de Dinastie bevat. Die kis het gedisintegreer en net 'n dun laag bladgoud en pleisterkalk het oorgebly.
Wat veral indrukwekkend in die grafkelder was, is silwer- en goue juweliersware soos ringe, silwerarmbande met die name van Seti II en Twosret, en 'n paar klein silwerhandskoene. Dit is onbekend wie die oorspronklike eienaar van die grafkelder was, maar sommige vermoed dit was 'n koningin uit die 18de Dianstie.[1][2]
Ligging, ontdekking en inhoud
[wysig | wysig bron]Die grafkelder is op 5 Januarie 1908[3] deur Edward Ayrton ontdek, wat uitgrawings namens Theodore Davis gedoen het. Nadat 'n skag ontdek is, het hulle met uitgrawings begin. Die skag het in een kamer uitgeloop. Die skag en kamer was albei vol puin weens vloede.[4][5]
.jpg)
Eerste is stukke erdeware en albasterflesse ontdek, waarvan sommige die cartouches van Seti II en Ramses II opgehad het. Latere vondste het ingesluit krale, asook goue en silwerware. 'n Enkele begrafnisbeeldjie van albaster sonder 'n inskrywing is ook ontdek.[4]
Die silwer- en goue juweliersware was van die skitterendste wat nog in die Vallei van die Konings ontdek is en die graf het die bynaam "Goue Grafkelder" gekry.[2] Die juweliersware wissel van 'n goue kransie en groot goue oorringe tot 'n halsband en verskeie stukke van verskillende halssnoere. Een van die armbande was dié van 'n kind, asook twee ringe en verskeie gelukbringers. Ayrton het voorgestel die inhoud is daar gelos tydens die oorname van Twosret se grafkelder, of dit is 'n rower se wegsteekplek.[6][7]
Rowers het in antieke tye die grafkelder binnegegaan en die meeste goedere gesteel. Hulle het die opening vir 'n tyd lank oopgelos, en modder en ander puin het ingespoel voordat dit weer behoorlik verseël is.[8] Daar word verder vermoed die grafkelder was dié van 'n prinses van nie ouer as vier jaar nie.[8]
Herondersoek
[wysig | wysig bron]Die grafkelder is tussen 1999 en 2002 stelselmatig weer uitgegrawe en herondersoek deur 'n span onder Nicholas Reeves. Nog bladgoud, stukke van halsbande en 'n goue plaat met die cartouche van Seti II is ontdek.[9]
Reeves het voorgestel die vorm van die aanvanklike grafkelder was vierkantig, met 'n enkele steunpilaar, wat kenmerkend was van die grafkelder vir 'n koningin uit die 18de Dinastie. Hy het verder voorgestel dit was bedoel vir die herberafnis van 'n koningin uit die Amarnatydperk, dalk Nefertiti of 'n ander vrou van Achenaten. Die grafkelder is naby KV55 én KV62, wat in die laat 18de Dinastie gebou is. Om KV56 is ook materiaal uit die Amarnatydperk gekry, soos erewerk, 'n stuk hout van 'n kis en 'n fragment van 'n albasterfles.[9]
Verwysings
[wysig | wysig bron]- ↑ Re-excavating ‘The Gold Tomb’ Geargiveer 16 September 2009 op Wayback Machine
- ↑ 2,0 2,1 Reeves, Nicholas; Wilkinson, Richard H. (1996). The Complete Valley of the Kings: Tombs and Treasures of Egypt's Greatest Pharaohs (2010 paperback uitg.). London: Thames and Hudson. p. 153. ISBN 978-0-500-28403-2.
- ↑ Reeves, C. N. (1990). Valley of the Kings: The decline of a royal necropolis. London: Kegan Paul International. pp. 131–133. ISBN 0-7103-0368-8.
- ↑ 4,0 4,1 Davis, Theodore M.; Maspero, Gaston; Ayrton, Edward; Daressy, George; Jones, E. Harold (1908). The Tomb of Siptah; The Monkey Tomb and the Gold Tomb (PDF). Londen: Archibald Constable and Co., Ltd. pp. 31–32. Besoek op 2 Desember 2020.
- ↑ Ayrton, E. R. (1908). "Recent Discoveries in the Biban El Moluk at Thebes". Proceedings of the Society of Biblical Archaeology. XXX: 116. Besoek op 24 Februarie 2021.
- ↑ Davis, Theodore M.; Maspero, Gaston; Ayrton, Edward; Daressy, George; Jones, E. Harold (1908). The Tomb of Siptah; The Monkey Tomb and the Gold Tomb (PDF). London: Archibald Constable and Co., Ltd. pp. xxviii. Besoek op 2 Desember 2020.
- ↑ Davis, Theodore M.; Maspero, Gaston; Ayrton, Edward; Daressy, George; Jones, E. Harold (1908). The Tomb of Siptah; The Monkey Tomb and the Gold Tomb (PDF). Londen: Archibald Constable and Co., Ltd. pp. 35–46. Besoek op 2 Desember 2020.
- ↑ 8,0 8,1 Aldred, Cyril (1963). "Valley Tomb No. 56 at Thebes". The Journal of Egyptian Archaeology. 49: 176–178. doi:10.2307/3855714. ISSN 0307-5133. JSTOR 3855714. Besoek op 2 Desember 2020.
- ↑ 9,0 9,1 Reeves, Nicholas. "The Amarna Royal Tombs Project: Four Years' Work, 1998–2002 (2003)" (in Engels). Besoek op 3 Desember 2020.
Skakels
[wysig | wysig bron]
Wikimedia Commons het meer media in die kategorie KV56.
Hierdie artikel is in sy geheel of gedeeltelik uit die Engelse Wikipedia vertaal.
