Gaan na inhoud

Sylvester Stallone

in Wikipedia, die vrye ensiklopedie
Sylvester Stallone
'n Beeld van die betrokke persoonlikheid.
Stallone in Augustus 2012.
Geboortenaam Sylvester Gardenzio Stallone
Geboorte 6 Julie 1946 (1946-07-06) (78 jaar oud)
New York-stad, VSA
Nasionaliteit Amerikaans
Beroep(e) Akteur, regisseur, draaiboekskrywer
Aktiewe jare 1970–tans
Webwerf www.sylvesterstallone.com
Internet-rolprentdatabasis-profiel

Sylvester Gardenzio "Sly" Stallone[1][2][3] (geb. 6 Julie 1946) is ’n Amerikaanse akteur, regisseur, vervaardiger en draaiboekskrywer.[4] Hy is bekend vir sy Hollywood-aksierolle, veral die bokser Rocky Balboa, die titelkarakter van die reeks Rocky-rolprente, in sewe prente tussen 1976 en 2015; die soldaat John Rambo van die Rambo-reeks tussen 1982 en 2008; en Barney Ross in die drie The Expendables-films tussen 2010 en 2014. Hy het die meeste van die draaiboeke in dié drie reekse geskryf of help skryf, en was die regisseur van baie.

In 1977 is Stallone vir twee Oscars benoem vir Rocky – vir beste oorspronklike draaiboek en beste akteur. Hy was net die derde persoon wat vir dieselfde rolprent in albei dié kategorieë benoem is, naas Charlie Chaplin en Orson Welles.[5] Hy het goeie resensies gekry vir sy uitbeelding van Rocky Balboa in Ryan Coogler se 2015-rolprent Creed, asook sy eerste Golden Globe en derde Oscar-benoeming.

Vroeë lewe

[wysig | wysig bron]

Stallone is in New York-stad gebore as die oudste seun van Frank Stallone sr., ’n haarkapper en skoonheidskundige, en Jackie Labofish, ’n astroloog, voormalige danser en promotor van vroueboks. Sy pa is in Italië gebore en het in die 1930's na Amerika geïmmigreer.[6][7] Sy ma is half-Frans en half-Oekraïens.[8][9] Sy jonger broer is die akteur en musikant Frank Stallone.

Tydens geboorte is ’n senuwee beskadig wat tot verlamming in dele van sy gesig gelei het:[10][11] die onderste linkerhelfte, insluitende dele van sy lip, tong en ken. Dit het aan hom sy kenmerkende voorkoms en onduidelike uitspraak besorg.[11][12] Toe hy sowat vier jaar oud was, het sy ma hom by ’n dansskool ingeskryf om te help vir sy plat voete.[13] Die gesin het in die vroeë 1950's na Washington, D.C. getrek, waar sy pa ’n skoonheidskool begin het. Sy ma het ' n vrouegimnasium begin.[14] Sy ouers is geskei toe hy nege was en hy het by sy ma gaan woon.[11]

Loopbaan

[wysig | wysig bron]
Stallone in 1988.

Stallone se eerste rolprentrol was in die sagtepornofliek The Party at Kitty and Stud's (1970). Hy is $200 betaal vir twee dae se werk.[15] Stallone het later verduidelik hy het dit uit desperaatheid gedoen omdat hy uit sy woonplek geskop is en dakloos was.[16] Die rolprent is jare later heruitgereik as as Italian Stallion om munt te slaan uit Stallone se nuutgevonde roem (die naam was Stallone se bynaam ná Rocky vanweë ’n sêding in die fliek).

Hy het ook van 28 Oktober tot 15 November 1971 in die erotiese off-Broadway-toneelstuk Score gespeel – ’n rolprent met dieselfde naam is later van die toneelstuk gemaak.

In 1970 het Stallone in die rolprent No Place to Hide gespeel. Dit is later so gesny dat Stallone die prent se ster was en heruitgereik onder die naam Rebel. Hy het ook verskeie ander klein rolle vertolk.

In 1976 het hy internasionale roem behaal met die treffer Rocky, waarvan hy die draaiboek geskryf het.[11] Hy het geweier om die draaiboek te verkoop tensy hy die hoofrol speel.[17]

Stallone in 1993 by die Cannes-rolprentfees.
Stallone se ster op die Hollywood Walk of Fame.

Rocky is vir 10 Oscars benoem, insluitende vir beste akteur en beste oorspronklike draaiboek vir Stallone. Dit het eindelik die Oscars vir beste rolprent, beste regisseur en beste redigering gewen.[18]

Hierna het Stallone sy debuut as regisseur gemaak en in 1978 die prent Paradise Alley gemaak. Hy het ook daarin gespeel. In dieselfde jaar het hy in F.I.S.T. gespeel en in die volgende jaar het hy Rocky II geskryf, geregisseer en daarin gespeel.[11]

In 1981 het hy saam met Michael Caine in Escape to Victory en saam met Rutger Hauer in die riller Nighthawks gespeel.

Stallone het in die vroeë 1980's nog ’n suksesvolle reeks flieks begin met sy rol as John Rambo, ’n Viëtnamese soldaat, in die aksie-oorlogprent First Blood (1982).[11] Dit was ’n reusesukses. Die opvolgprente, Rambo: First Blood Part II (1985) en Rambo III (1988), is minder geloof hoewel hulle ook treffers by die loket was. Hierna het hy die Rocky-franchise voortgesit en eindelik dié rol in 11 prente gespeel.

Hy het ook met wisselende sukses sy hand aan ander genres gewaag. In 1984 het hy Rhinestone saam met Dolly Parton geskryf en saam met haar daarin opgetree as ’n hoopvolle countrysanger. Daarna het minder suksesvolle rolle gevolg in Over the Top (1987), nog Rocky-prente (1990's), Oscar (1991) en Stop! Or My Mom Will Shoot (1992).

In 1993 het hy ’n terugkeer gemaak met Cliffhanger, wat weer ’n reusesukses was. Later het nog prente gevolg: Demolition Man (1993), The Specialist (1994), Judge Dredd (1995), Assassins (1995), Daylight (1996) en Cop Land (1997).

In 2000 was Stallone te sien in Get Carter (2000), en daarna het sy gewildheid afgeneem met rolle in Driven (2001), Avenging Angelo (2002) en D-Tox (2002). In 2003 was hy weer in die suksesvolle Spy Kids-trilogie. Nog minder geslaagde vertonings het gevolg voordat hy in die neo-noir-misdaaddrama Shade (2003) gespeel het. Dit het ’n beperkte uitreiking gehad, maar is deur resensente geloof.[19]

Ná ’n blaaskans van drie jaar het Stalloone in 2006 teruggekeer met die sesde Rocky-prent, Rocky Balboa, wat ’n sukses was. In 2008 het die vierde Rambo-prent, wat bloot Rambo genoem is, gevolg. Dit was weer eens ’n sukses.

The Expendables was Stallone se groot treffer in 2010. Hy het dit geskryf, geregisseer en daarin gespeel. Ander akteurs sluit in Jason Statham, Jet Li, Dolph Lundgren en Mickey Rourke, en Bruce Willis en Arnold Schwarzenegger was in kameerolle te sien.[20] Dit was dadelik die no. 1-treffer by die Amerikaanse loket – dit het die suksesvolste naweekopening van al sy prente gehad.[21] The Expendables 2 is in 2012 uitgereik en is positief ontvang.[22] Dié prent het benewens die oorspronklike akteurs ook Jean-Claude Van Damme en Chuck Norris ingesluit.

Hierna het gevolg Bullet to the Head en Escape Plan (2013), The Expendables 3 (2014) en Creed (2015). Laasgenoemde was op die Rocky-prente geskoei en gaan oor sy oorlede vriend/teenstander Apollo Creed se seun wat ’n bokser word. Dit was Stallone se sewende vertolking van Rocky en hy het groot lof daarvoor gekry, asook die Golden Globe in 2016 vir beste manlike byspeler en sy derde Oscar-benoeming, ook vir beste manlike byspeler.

Verwysings

[wysig | wysig bron]
  1. ↑ Felicity Thistlethwaite (15 November 2013). "Tango and dash? Sylvester Stallone reveals a very orange face as he heads out in New York". Daily Mail (in Engels). Geargiveer vanaf die oorspronklike op 14 April 2020. Besoek op 4 Januarie 2014.
  2. ↑ "Sylvester Stallone". New York Times (in Engels). Geargiveer vanaf die oorspronklike op 5 Maart 2016. Besoek op 7 November 2014.
  3. ↑ Sylvester Stallone in die Internet-rolprentdatabasis
  4. ↑ "Don't give up the day job... Sylvester Stallone tries his hand at fine art with mixed results". Daily Mail (in Engels). 3 Desember 2009. Geargiveer vanaf die oorspronklike op 25 Desember 2018.
  5. ↑ "The 49th Academy Awards Memorable Moments". Oscars.org - Academy of Motion Picture Arts and Sciences (in Engels). Geargiveer vanaf die oorspronklike op 5 April 2020.
  6. ↑ "Video of Stallone visiting Italy". Youtube (in Engels). Geargiveer vanaf die oorspronklike op 9 Desember 2019. Besoek op 4 September 2010.
  7. ↑ "Polo Player and former Marylander Frank Stallone Dies". equiery.com (in Engels). Geargiveer vanaf die oorspronklike op 23 Maart 2016.
  8. ↑ "Cinéma. Stallone est de Brest « même » !", Le Télégramme de Brest, 6 Oktober 2009
  9. ↑ "Sylvester Stallone's mother visited Odessa". Amptelike webtuiste van Odessa (in Oekraïens). Geargiveer vanaf die oorspronklike op 29 Januarie 2019. Besoek op 5 Julie 2015.
  10. ↑ The Biography Channel (2007). "Sylvester Stallone Biography". Geargiveer vanaf die oorspronklike op 13 Desember 2009. Besoek op 28 Desember 2009.
  11. ↑ 11,0 11,1 11,2 11,3 11,4 11,5 In Inside the Actors Studio, 1999
  12. ↑ "Sylvester Stallone can still pack a punch at 68". mid-day (in Engels). 21 Augustus 2014. Geargiveer vanaf die oorspronklike op 27 April 2019.
  13. ↑ "'I look like a chipmunk': 91-year-old Jackie Stallone reveals her plastic surgery regrets after suffering a third heart attack" (in Engels). Geargiveer vanaf die oorspronklike op 23 Desember 2017. Besoek op 4 Augustus 2014.
  14. ↑ Stallone, Sylvester. Sly Moves: My Proven Program to Lose Weight, Build Strength, Gian Will Power and Live Your Dream, Rogue Marble Productions, 2005, p. 12.
  15. ↑ Total Film, Augustus 2010, VK
  16. ↑ Sylvester Stallone-onderhoud Geargiveer 6 Junie 2011 op Wayback Machine, Playboy, September 1978
  17. ↑ Nelson, Murray R. (23 Mei 2013). American Sports: A History of Icons, Idols, and Ideas [4 Volumes]: A History of Icons, Idols, and Ideas. p. 1095.
  18. ↑ "Rocky Award Wins and Nominations" (in Engels). IMDb. Geargiveer vanaf die oorspronklike op 6 Oktober 2018. Besoek op 21 Mei 2010.
  19. ↑ "Shade" (in Engels). Rotten Tomatoes. Geargiveer vanaf die oorspronklike op 2 Mei 2019. Besoek op 4 September 2010.
  20. ↑ "Action Movie Sequel Time: The Expendables 2, And More Inglorious Basterds Prequel Talk" (in Engels). Slashfilm.com. 9 Julie 2009. Geargiveer vanaf die oorspronklike op 2 November 2010. Besoek op 4 September 2010.
  21. ↑ "Weekend Report: 'Expendables' Pump Up, 'Eat Pray Love' Pigs Out, 'Scott Pilgrim' Powers Down" (in Engels). Box Office Mojo. Geargiveer vanaf die oorspronklike op 25 Maart 2016. Besoek op 4 September 2010.
  22. ↑ "Expendables 2" (in Engels). Rotten Tomatoes. Geargiveer vanaf die oorspronklike op 6 Mei 2019. Besoek op 20 Augustus 2012.

Eksterne skakels

[wysig | wysig bron]
Ontsluit van "https://af.wikipedia.org/w/index.php?title=Sylvester_Stallone&oldid=2512425"