Pauline Chaponnière-Chaix

d Pauline Chaponnière-Chaix, ca. 1920

Unterschrift vu 1923

D Pauline Chaponnière-Chaix (* 1. Novämber 1850 z Gämf; † 6. Dezämber 1934 au deert) isch e Schwyzer Fraueräächtleri gsii.

Lääbe

D Pauline Chaix isch as eltschts vu vier Chinder vum Geograaf Paul Chaix un däm syre Frau Adèle geb. Chaponnière ufgwagse. E elteri Schweschter isch voor ire Gebuurt scho gstoorbe gsii. In irem buurgerlige Elterehuus het si frie Änglisch gleert un het um 1865 fir ai Joor z Dytschland gläbt. Im Alter vu 18 Joor het si dr zee Joor elter Bankier Edouard Chaponnière ghyroote, wu ne entfäärnet Verwandte vuz dr Muetersyte häär gsii isch. D Ee isch chinderloos bliibe, ire Mann isch noch ere lengere Chranket 1878 in ere psichiaatrische Aastalt gstoorbe.

Di jung Witfrau isch anne 1880 in s Diakonissehaim z Reuilly bi Paris yydrätte un het lengeri Zyt z Frankryych gschafft: zeerscht in eme Chinderasiil, derno im Gfängnis Saint-Lazare z Paris, druf zwai Joor lang in eme Frauegfängnis vu Doullens un schließli bis 1893 im proteschtantische Maidlihaim Les Ombrages z Versailles. Dernääbe het si Chrankeschweschter gleert.

Wäge Erschepfig isch si zum Erhoole an Gämfersee retuurchuu, wu si zwische Céligny un Crans-près-Céligny in eme Chalet vu irem verstoorbene Mann gwoont het, emänd isch si in dr Schwyz bliibe. D Chaponnière-Chaix het si ab doo zäme mit dr Emilie Gourd un dr Emilie Lasserre gsellschaftsbolitisch in dr Union des femmes de Genève engaschiert. Si isch im Organisazioonskumitee vum Eerschte Schwyzerische Kungräss fir d Inträsse vu dr Frau 1896 gsii. Zwische 1902 un 1905 sich si Bresidänti vu dr Union des Femmes un speeter d Vizebresidänt vun ere in dr Zyt vum Eerschte Wältchrieg giis. Zäme mit dr Auguste de Morsier un dr Camille Vidart het si anne 1907 d Gämfer Verainigung fir Frauestimmräächt grindet.

Dr 1899/1900 vun ere mitgrindet Bund vu Schwyzerische Fraueverain (BSF) het d Chaponnière-Chaix 1903 derzue brocht, ass er Mitgliid vum Internazionaale Fraueroot (ICW) wooren isch. Vu 1904 bis 1910 un wider vu 1916 bis 1920 het si as BSF-Bresidänti gamtet. Si un d Vidart hän dr BSF 1919 in ere Sundersitzig derzue brocht, ass er ere Initiatiiv fir s Frauestimmräächt zuegstimmt het. Derno isch si in dr Zyt vu 1920 bis 1922 Bresidänti vum ICW gsii, wu d Ishbel Maria Hamilton-Gordon iri Amtszyt unterbroche ghaa het. Zäme mit dr Helene von Mülinen un dr Vidart het si au dr zweet Kungräss fir Fraueninträsse organisiert, wu 1921 z Bärn gsii isch. Wel si alli drei Sprooche, wu in dr internazionaale Frauebeweegig um die Zyt voorgheerscht hän, Änglisch, Franzeesisch un Dytsch, guet chet chenne,isch si as Organisatoori gfrogt gsii, unterr anderem scho bi dr Vollversammlig vum ICW anne 1908 z Gämf.

Näb dr Fraueräächt het si si au mit Frooge vu dr Chrankebflääg bscheftigt un isch ab 1922 as Noofolgeri vu dr Marguerite Frick-Cramer di zwoot Frau gsii, wu Mitgliid Internazionaale Kumitee vum Roote Chryz wooren isch, zwische 1930 un 1932 isch si di eerscht Vizebresidänti vu sällem gsii.

Literatur

• Martine Chaponnière: Chaponnière-C xahaix, Pauline. In: Historisches Lexikon vo dr Schwiiz.

Fueßnote

Dä Artikel basiert uff ere fräie Übersetzig vu dere Version vum Artikel „Pauline_Chaponnière-Chaix“ vu de dütsche Wikipedia. E Liste vu de Autore un Versione isch do z finde.