Бэнэдыкт Нурсійскі

Бэнэдыкт Нурсійскі
Сьвяты
Нарадзіўся	3 сакавіка 480
Памёр	23 сакавіка 547 (67 гадоў)
Дзень памяці	11 ліпеня, 21 сакавіка, 27 сакавіка і 11 ліпеня
Бэнэдыкт Нурсійскі ў Вікісховішчы

Бэнэдыкт Нурсійскі, Сьв. Бэнэдыкт, Сьв. Вэнэдыкт па-лацінску: Sanctus Benedictus de Nursia, 480?, Нурсія (суч. Норча), Італія — 21 сакавіка 547, Монтэ-Касына, Італія) — заснавальнік заходняга манаскага руху. Сьвяты каталіцкай і праваслаўнай царквы. У праваслаўнай традыцыі лічыцца вялебным. Аўтар «Статута Сьв. Бенедыкта» — самага значнага з манаскіх статутаў лацінскай традыцыі. Лічыцца апекуном Эўропы і ўсяго Захаду, а таксама настаўнікаў і школьнікаў.

Практычна адзінай крыніцай зьвестак пра жыцьцё сьв. Бэнэдыкта зьяўляецца кніга «Дыялёгі» сьв. Рыгора Вялікага, папы Рымскага.

Жыцьцяпіс

Паходзіў з багатай сям’і. Пакінуўшы вучобу ў Рыме, стаў жыць пустэльнікам. Праз пэўны час вакол яго сабралася шмат іншых манахаў, і каля 529 году ён разам з паплечнікамі заснаваў на поўдні ад Рыму славуты кляштар Монтэ-Касына. Асноўным правілам манаскага жыцьця ў ім былі словы «Ora et labora» («Маліся і працуй»), якія сталі дэвізам ордэна бэнэдыктынцаў. У Монтэ-Касына Бэнэдыкт напісаў статут — Ordo Sancti Benedicti, — які стаў асноваю для большасьці манаскіх супольнасьцяў Захаду.

Сьвяты Бэнэдыкт памёр 21 сакавіка 547 году і быў пахаваны на Монтэ-Касына каля магілы сваёй сястры-блізьняці сьвятой Схалястыкі. У Касьцёле вельмі папулярны мэдалік зь яго выявай і крыжам, што абараняе ад злых чараў і магіі.

Бэнэдыктыйцы

Заснаваны ім ордэн бэнэдыктынцаў на працягу стагодзьдзяў быў найбольш значным духоўным, культурным і навуковым асяродкам Эўропы. У 590 годзе бэнэдыктынец упершыню стаў Папам. Гэта быў сьвяты Рыгор Вялікі — славуты касьцёльны рэфарматар, які пакінуў найбольш зьвестак пра сьвятога Бэнэдыкта (і пазьней вельмі часта на Пасадзе сьвятога Пятра знаходзіліся менавіта бэнэдыктынцы). Такім чынам сьціплы манах-пустэльнік распачаў найбольшае ў гісторыі аднаўленьне Касьцёлу і стаў «будаўніком хрысьціянскага Захаду».

Сьвята

Яго літургічнае сьвята адзначаецца ў каталіцкай, англіканскай і эвангельскай цэрквах 11 ліпеня ў памяць аб перанясеньні рэліквій з Монтэ-Касына ў абацтва Флеры (11 ліпеня 673 г.). Гэтае штогадовае сьвята было ўстаноўлена Паўлам VI.

Сьвята бэнэдыктынцаў, цыстэрцыянцаў і трапістаў адзначаецца ў дзень сьмерці сьв. Бэнэдыкта — 21 сакавіка, а дзень дабраславеньня кляштару Монтэ-Касына адзначаецца 1 кастрычніка.

Праваслаўная царква адзначае сьвятога манаха 14/27 сакавіка, гэта значыць 27 сакавіка паводле Грыгарыянскага календару.

Армянская Цэрква, выкарыстоўваючы юліянскі каляндар у сваёй літургіі, успамінаюць сьв. Бэнэдыкта 21 сакавіка/3 красавіка, гэта значыць 3 красавіка паводле цяперашняга Грыгарыянскага календару.

Вонкавыя спасылкі

• СВЯТЫ БЭНЭДЫКТ НУРСІЙСКІ, Наша Вера, № 3(37)/2006