9-я гарадзкая клінічная лякарня

9-я гарадзкая клінічная лякарня
Абрэвіятура	9-я ГКЛ
Дата ўтварэньня	31 сьнежня 1976 (47 гадоў таму)
Тып	лякарня
Юрыдычны статус	установа аховы здароўя
Месцазнаходжаньне	Менск, Маскоўскі раён, вул. Сямашкі, д. 8
Галоўны лекар	Валеры Кушнірэнка
Намесьнік па хірургіі	Алег Румо
Намесьнік па лекавай працы	Анатоль Вус
Галоўная мэдсястра	Сьвятлана Зянько
Асноўныя асобы	Вадзім Мацюшка, Тацяна Камянецкая
Матчына кампанія	Менскі гарадзкі выканаўчы камітэт
Колькасьць супрацоўнікаў	1704 (2016 г.)
Сайт	m9gkb.by

9-я гарадзкая клінічная лякарня — буйная лякарня Менску, заснаваная ў сьнежні 1976 году.

На 1 жніўня 2016 году 9-я гарадзкая клінічная лякарня налічвала 1005 ложкаў: 519 тэрапэўтычнага напрамку (кардыялягічны, пульманалягічны, гематалягічны, рэўматалягічны і гастраэнтэралягічны), 245 хірургічнага, 198 нэўралягічнага і 43 у аддзяленьні інтэнсіўнай тэрапіі і рэанімацыі (АІТР). На 2018 год на аснове лякарні працавала 7 катэдраў Беларускага дзяржаўнага мэдычнага ўнівэрсытэту, катэдра кардыёхірургіі Беларускай мэдычнай акадэміі пасьлядыплёмнай адукацыі і 6 Рэспубліканскіх цэнтраў: 1) трансплянтацыі органаў і тканак, 2) гематалёгіі і перасадкі касьцянога мозга, 3) гемафілічны, 4) рэўматалягічны, 5) экстракарпаральных мэтадаў карэкцыі гамэастазу, 6) нэфралёгіі і ныркава-замяшчальнай тэрапіі. 9-я лякарня прымае па накіраваньні пацыентаў 14 гарадзкіх паліклінік Менску. У склад лякарні ўваходзілі 5 клінічных аддзелаў: 1) трансплянталёгіі; 2) гепаталёгіі і малаінвазіўнай хірургіі; 3) нэфралёгіі, ныркава-замяшчальнай тэрапіі і трансплянтацыі ныркі; 5) анэстэзіялёгіі і рэанімацыі; 6) вузавых трансплянтатаў. Навуковы аддзел лякарні ўлучаў 4 групы: імунафэнатыповых спосабаў дасьледаваньня; малекулярна-цытагенэтычных дасьледаваньняў; вузавых біятэхналёгіяў; эпідэміялягічных дасьледаваньняў хваробаў крыві. У лякарні працавала адзіная ў Беларусі брыгада шматорганнага забору і 2 банкі вузаў і тканак: мезенхімальных ствалавых вузаў; кляпанных алаграфтаў (для кардыёхірургіі).

Платныя паслугі

На 2018 год 9-я гарадзкая клінічная лякарня аказвала наступныя платныя паслугі:

• сцынтыграфія ўнутраных органаў;
• радыёграфічнае дасьледаваньне ныркі;
• ультрагукавое дасьледаваньне (УГД) ўнутраных органаў;
• кампутарная тамаграфія (КТ) без унутранага ўзмацненьня;
• электракардыёграма (ЭКГ), у тым ліку содневае;
• вэляэргамэтрыя (ВЭМ);
• рэаграфія ўнутраных органаў;
• дасьледаваньне зьнешняга дыханьня;
• электраэнцэфаляграфія (ЭЭГ);
• эзафагагастадуадэнаскапія (ФГДС) зь біяпсіяй;
• рэктаскапія;
• рэнтгенаграфія ўнутраных органаў;
• лячэньне зубоў;
• масаж;
• іглаўкалваньне, у тым ліку электрычнае, мікра-, магніталазэрнае і палыннымі цыгарамі;
• электрапунктура;
• агульны і біяхімічны аналізы крыві, у тым ліку групы і рэзуса, антыцелаў, бялкоў і тлушчоў, гемастазіёграма;
• аналіз брулёў;
• вызначэньне дэзоксырыбануклійных (ДНК) і рыбануклійных кісьляў узбуджальнікаў заразных хваробаў, у тым ліку віруса гепатыту, герпэса, папілёмы, цытамэгалявіруса, вагінальных трыхаманадаў і гарднэрэлаў, хлямідыяў, урэна- і мікаплязмаў.
• замарозка і захоўваньне пупавіннай крыві.

Аддзяленьні

На 2018 год 9-я гарадзкая клінічная лякарня налічвала 2 клінікі, клініка-дыягнастычную лабяраторыю і 12 агульналякарневых аддзяленьняў:

• прыёмнае;
• 5 аддзяленьняў анэстэзіялёгіі і рэанімацыі, у тым ліку № 2 — хірургічнае, № 3 — гематалягічнае, № 4 — з палатай прабуджэньня і № 5 — кардыёхірургічнае;
• мэдычнай рэабілізацыі;
• рэнтгенаўскай кампутарнай тамаграфіі;
• ультрагукавой дыягностыкі;
• функцыянальнай дыягностыкі;
• рэнтгенаўскае;
• эндаскапічнае.

Клініка-дыягнастычная лябараторыя 9-й лякарні ўлучала 6 участкаў: імунагематалягічны; імунафэрмэнтных дасьледаваньняў; дасьледаваньняў сыстэмы гемастазу; клінічнай гематалёгіі; клінічнай хіміі; агульнаклінічных дасьледаваньняў. Хірургічная клініка 9-й лякарні ўлучала ангіяграфічны кабінэт, апэрацыйны блёк і 8 аддзяленьняў: 1) кардыёхірургічнае; 2) каардынацыі; 3) партальнай гіпэртэзіі; 4) трансплянтацыі; 5) трансплянацыі шпіка; 6) эктракарпаральных спосабаў дэтаксікацыі; 7) экстранай хірургіі; 8) такаральнае. Тэрапэўтычная клініка 9-й лякарні мела 15 аддзяленьняў:

• гастраэнтэралягічнае;
• 3 кардыёлягічныя аддзяленьні, зь іх № 1 — для інфарктных хворых;
• 4 нэўралягічныя, зь іх № 1 і 3 — аддзяленьні хуткай мэдычнай дапамогі (АХМД);
• 4 гематалёгіі, зь іх № 4 — дзённы стацыянар;
• нэфралёгіі і гемадыялізу;
• пульманалягічнае;
• рэўматалягічнае.

Мінуўшчына

31 сьнежня 1976 году ў Менску (Беларуская ССР) адчынілі 9-ю гарадзкую клінічную лякарню. У 1977 годзе ў лякарні адчынілі лябараторыю гема- і лімфасорбцыі для распрацоўкі спосабаў вылячэньня ад ныркавай і пячонкавай недастатковасьці і дэтаксыкацыйных спосабаў вылячэньня, якая была адзінай у лякарнях СССР. Адчыніліся аддзяленьні гепаталёгіі і гематалёгіі. У 1980 г. 9-я лякарня дасягнула поўнай магутнасьці ў 1380 ложкаў і мела найбольшую хірургічную службу ў Менску. У 1984 годзе ў лякарні працавала 10 рэспубліканскіх асяродкаў. У 1993 годзе пры лякарні пачаў працу Рэспубліканскі цэнтар гематалёгіі і трансплянтацыі шпіка, які з 1994 году стаў удзельнікам Эўрапейскага таварыства трансплянтацыі шпіка (Швайцарыя). У выніку сталі перасаджваць ствалавыя вузы пры лячэньні злаякасных новаўтварэньняў, лейкозу і расьсеяннага склерозу. У 2007 годзе ў прыёмным аддзяленьні лякарні стварылі першы ў Беларусі анэстэзіёляга-рэанімацыйны пост. У красавіку 2008 году ў 9-й лякарні правялі ўпершыню ў Беларусі перасадку печані. У 2009 годзе ў лякарні стварылі Гарадзкі рэгістар донараў шпіка і ствалавых вузаў, які ў 2014 г. пераўтварылі ў Цэнтральны рэестар донараў гемапаэтычных ствалавых вузаў. У 2009 годзе адбылася перабудова 9-й лякарні коштам $45 млн.

У 2010 годзе 9-я лякарня забясьпечыла 30% экпарту лекарскіх паслуг Менску. Перасадку органаў ажыцьцявілі жыхарам 11 краінаў Азіі і 6 краінаў Эўропы. У студзені 2010 г. на аснове лякарні стварылі Рэспубліканскі навукова-практычны цэнтар трансплянтацыі органаў і тканак, які ўзначаліў Алег Румо. За першыя 2 гады правялі 129 перасадак печані. За 2011 год перасадзілі 175 нырак, 43 печані і 2 падстраўнікавыя залозы. Падбор органаў і тканак забясьпечылі лябараторыя вызначэньня сумяшчальнасьці і лябараторыя вузавых біятэхналёгіяў, што зьяўлялася адзінай у Беларусі ўстановай для вылучэньня і падрыхтоўкі вузаў да выкарыстаньня для лячэньня пацыентаў. У 2011 годзе 9-я лякарня зарабіла $3 млн на лекаваньні замежных грамадзянаў. За 2011 год у 9-й лякарні аказалі стацыянарную дапамогу блізу 39 000 пацярпелым і выканалі звыш 11 000 хірургічных умяшаньняў, зь іх звыш 300 перасадак органаў і тканак. 30 чэрвеня 2011 году Міністэрства аховы здароўя Рэспублікі Беларусь выдала 9-й лякарні пасьведчаньне навуковай установы за № 10. На чэрвень 2012 году ў складзе 9-й лякарні налічвалася 26 клінічных і 19 параклінічных аддзяленьняў. Таксама на аснове лякарні працавалі 5 катэдраў Беларускага дзяржаўнага мэдычнага ўнівэрсытэту, катэдра Беларускай мэдычнай акадэміі пасьлядыплёмнай адукацыі і 4 Рэспубліканскія цэнтры. Для іншаземцаў перасадка ныркі каштавала $20-$50 тыс., печані — $40-$80 тыс., шпіка — да $120 тыс.

Галоўныя лекары

• Аляксандар Скачко (31 сьнежня 1976 — сакавік 1996)
• Уладзімер Мількаманавіч (сакавік 1996 — лістапад 1999)
• Валеры Кушнірэнка (зь лістапада 1999 году)

Вонкавыя спасылкі

• Платныя паслугі для грамадзянаў Беларусі (рас.) // УАЗ «9-я гарадзкая клінічная лякарня», 30 сакавіка 2018 г. Праверана 2 красавіка 2018 г.