Clwb Golff Caerdydd
 | |
| Enghraifft o'r canlynol | clwb golff  |
|---|---|
| Gwlad |  Cymru |
| Dechreuwyd | 1921 |
 | |
| Gwladwriaeth | y Deyrnas Unedig |
| Rhanbarth | Cyncoed |
Mae Clwb Golff Caerdydd (Saesneg: Cardiff Golf Club) yn glwb golff a leolir yn ardal maestref Cyncoed yn y brifddinas. Fe'i sefydlwyd yn 1921 ar dir Fferm Tŷ To Maen, oedd ar y pryd yn eiddo i Ewan G. Davies, cyfreithiwr a thirfeddiannwr.[1] Lleolir y clwb ar Sherborne Avenue, Cyncoed, Caerdydd.
Y cwrs
[golygu | golygu cod]Mae hyd y cwrs oddeutu 6,000 llath ac mae'n gwrs parcdir. Mae'n gwrs 18 twll, a ddylunwyd gan y golffiwr proffesiynol Robert Walker a nifer o aelodau'r pwyllgor yn syth wedi bwrcasu'r tir.[2] Yn ôl pleidlais gan wefan Top 100, roedd y clwb yn un o ugain cwrs golff gorau Cymru.[3]
Hanes
[golygu | golygu cod]Nid dyma glwb golff hynaf Caedydd - mae clybiau Llanisien, Radur, a'r Eglwys Newydd yn hŷn.
Sefydlwyd y clwb yn sgil penderfyniad dau ddyn ifanc, Reuben J Pugsley a Trevor Williams, oedd am weld clwb yng ngogledd ddwyrain y ddinas. Roedd y dau olffiwr wedi cael llond bol o seiclo i gwrs Leys ger yn y Barri i chwarae. Rhoddwyd hysbyseb ym mhapur y Western Mail, a arianwyd gan Robert Webber. Ar 24 Mai 1921 cynhaliwyd cyfarfod yn Eglwys Santes Marged, Gerddi Waterloo, Caerdydd ar gyfer pobl oedd yn cefnogi creu clwb a chwrs golff newydd. Cadeiriwyd y cyfarfod gan y cynullydd Mr R J Pugsley a denodd sylw dros 500 o bobl. Penodwyd Trevor Williams yn ysgrifennydd a ffurfiwyd pwyllgor cychwynnol i symud y prosiect yn ei flaen. Cyn hir roedd rhestr aelodaeth arfaethedig o 650 o bobl o'r ddau ryw.[1]
Cyfeiriwyd at y clwb yn wreiddiol fel Clwb Golff Penylan (oedd yn fwy cywir fel enw ac yn darlunio daearyddiaeth y clwb yn well), ond maes o lew penderfynwyd ar yr enw Cardiff Golf Club (yn uniaith Saesneg bid siŵr).
Mae’r clwb wedi gwneud cyfraniad sylweddol i golff Cymru dros y blynyddoedd, gan gynhyrchu llawer o Bencampwyr Amatur a Rhyngwladol dros Gymru gan gynnwys H C Squirrell Ysw, Pencampwr Amatur Cymru bum gwaith. Mae'r clwb hefyd wedi cynnal Pencampwriaeth Broffesiynol Cymru ar sawl achlysur.
Newid cwrs
[golygu | golygu cod]Ym 1972 gwerthodd y Clwb dir y tu ôl i'r 13eg a'r 15fed tî o dan Orchymyn Prynu Gorfodol i Gyngor Dinas Caerdydd am £18,500. Roedd angen y tir hwn ar gyfer ffordd perimedr newydd Pentwyn. O ganlyniad gadawyd y Clwb gyda pharsel trionglog o dir oddi ar Ffordd Tydraw wedi'i wahanu oddi wrth y Cwrs ac a werthwyd yn y diwedd ym 1996. Roedd y swm a gafwyd o’r gwerthiant hwn ynghyd â swm sylweddol pellach a dderbyniwyd fel ad-daliad TAW yn dilyn dyfarniad gan y Comisiwn Economaidd Ewrop (un o gyrff yr Undeb Ewropeaidd), at y posibilrwydd o wella cyfleusterau'r clwb.[4]
Dolenni allanol
[golygu | golygu cod]- Gwefan swyddogol Clwb Goff Caerdydd
- @CardiffGolfClub tudalen Facebook y Clwb
- Lleoliad y clwb ar wefan Coflein Comisiwn Brenhinol Henebion Cymru
Cyfeiriadau
[golygu | golygu cod]- ↑ 1.0 1.1 "Cardiff Golf Club Centenary". Gwefan Clwb Golff Caerdydd. 2021. Cyrchwyd 7 Hydref 2024.
- ↑ "Cardiff Golf Course". Gwefan Top 100 Golf Courses. Cyrchwyd 7 Medi 2024.
- ↑ "Course Overview". Gwefan CGC. Cyrchwyd 8 Hydref 2024.
- ↑ "Clubhouse History". Gwefan CFC. Cyrchwyd 8 Hydref 2024.
