Mitolojia roman antica
La mitolojia roman ia ave du edas: la eda prima es la propre mitolojia de la romanes; la eda du es un mitolojia multe influeda par la mitolojia de la elinicas e otra mitolojias plu este.
La romanes antica no ia ave naras ordinada sur sua dios como la elinicas. En loca, los ia ave un sistem complicada de rituos, organizas de pretes, e panteones de dios relatada, con ance un colie rica de mitos istorial sur la fundi e crese de la site de Roma, con atores umana e, a veses, la envolve de dios.
Per esemplo, un roman antica ta dise ce Ceres ave un prete ofisial, nomida un flamen, ci es un inferior de la flamenes de Jupiter, Marte e Quirino, ma un superior de la flamenes de Flora e Pomona. El ta dise ce Ceres es parteni a un truple con du otra dios de cultiva, Liber e Libera. E cisa el ta dona un lista de dios minor con postos spesial ci servi Ceres: Sarritor (per estrae malerbas), Messor (per recolie), Convector (per la caros), Conditor (per la reservas), Insitor (per semes), e multe otras.
En tempos plu tarda, la relijio orijinal de la romanes ia es alterada par la ajunta de credes diversa e nonacordante, e par la asorbe de multe partes de la mitolojia elinica. Nos conose partes de la relijio roman orijinal no de reportas de romanes de la eda prima, ma de scrivores plu tarda ci ia vole salva costumes vea de la nonusa. Otra scrivores antica, como Ovidio, ia es influeda par la moda de la elinicas, e ia usa credes elinica per pleni la fesures en la costumes roman.
La dios major
[edita | edita la fonte]- Apollo - dio de la sol, poesia, musica e oraculos
- Bona Dea - divo de fertilia, cura, virjinia e femas (ance nomida Fauna)
- Dioniso - dio de vino e la joia de seso (ance nomida Baco)
- Carmenta - diva de nase e profetas
- Ceres - diva de recolie e la madre de Proserpina
- Cibele - madre de la tera
- Diana - diva de la xasa, la luna, virjinia e nase, la jemelo de Apollo
- Flora - diva de flores
- Fortuna - diva de fortuna
- Jano - la dio con du testas, la dio de portes e de comensas e finis
- Juno - rea de la dios e la diva de sposi
- Jupiter - re de la dios e la dio de tempestas, la aira e la sielo
- Marte - dio de gera e la padre de Romulo, la fundor de Roma
- Mercurio - la mesajor de la dios e la portor de spiritos a la mundo suteran
- Minerva - la diva de sajia e de gera
- Netune - la dio de la mar, de tremas de tera e de cavalos
- Opi - la diva de abunda
- Pluto - la re de la mores
- Pomona - diva de arbores de fruta
- Portunes - dio de claves, portes e bestias
- Proserpina - diva de la mor e de grano
- Quirino - un dio de gera (Romulo, la fundor de Roma, ia deveni la dio Quirino pos sua mori)
- Saturno - un titan, dio de la recolie e cultiva, la padre de Jupiter, Netuno, Juno e Pluto
- Venus - diva de ama e belia, madre de la eroe Eneas
- Vesta - diva de la ximine e la stato de Roma
- Volturno - un dio de acua
- Vulcan - dio de la foco, forja e forjores
Lia esterna
[edita | edita la fonte]
