မီတီအိုရာ

Meteora
ဒေသခေါ်အမည် ဂရိ: Μετέωρα
Landscape of Meteora
တည်နေရာ	Thessaly, Greece
ကိုဩဒိနိတ်	39°42′51″N 21°37′52″E
ယူနက်စကို ကမ္ဘာ့အမွေအနှစ်နေရာ
တရားဝင်အမည်: Meteora
အမျိုးအစား	Cultural
ရွေးချယ်သည့် စံနှုန်း	i, ii, iv, v, vii
ရွေးချယ်သတ်မှတ်ခြင်း	1988 (12th session)
ရည်ညွှန်းနံပါတ်	455
State Party	Greece
Region	Europe

ဂရိနိုင်ငံအလယ်ပိုင်းရှိ ကာလမ်ဘာကာမြို့အနီးတွင် –ထာဝရဘုရား၏တောင်— အဖြစ် လူသိများသည့် အေသို့စ်တောင်ပေါ်၌ –မီတီအိုရာ— အမည်ရှိသော အရှေ့ပိုင်း အော်သိုဒေါ့ခ် ခရစ်ယာန်ဘုရားကျောင်းများ တည်ရှိသည်။ ရင်သပ်ရှုမောဘွယ်ကောင်းသည့် ရှေးဗိသုကာလက်ရာများကြောင့် နာမည်ကျော်ကြားသော အဆိုပါ ဘုရားကျောင်းများကို တည်ဆောက်ခဲ့သည့် ခုနှစ်ကိုမူ တိတိကျကျ သိရှိခြင်း မရှိခဲ့ကြသော်လည်း သမိုင်းပညာရှင်များက ၁၄-ရာစုခန့်က တည်ဆောက်ခဲ့ခြင်းဖြစ်နိုင်သည်ဟု ယူဆကြသည်။

အဆိုပါဘုရားကျောင်းများသည် ပင်လယ်ရေမျက်နှာပြင်အထက် ပေပေါင်း ၁၃၀၀ ကျော်မြင့်သော နေရာရှိ သဘာဝအတိုင်းဖြစ်တည်နေသည့် ကျောက်တောင်များပေါ်၌ တည်ဆောက်ထားခြင်းဖြစ်ပြီး မူလက ဘုရားကျောင်းအရေအတွက် (၂၄)ခုခန့် ရှိခဲ့သော်လည်း ယနေ့အချိန်တွင် (၆)ခုသာကျန်ရှိတော့သည်။ အဆိုပါဘုရားကျောင်းများသည် ပိုင်းနိရို့စ်မြစ်နှင့် ပင်းဒတ်တောင်တန်းအနီးရှိ သိ့စလီလွင်ပြင်၏ အနောက်မြောက်ဘက်ရှိ ကာလမ်ဘာကာမြို့အနီးတွင် တည်ရှိသည်။ အဆိုပါဘုရားကျောင်းများကို ယူနက်စကိုကမ္ဘာ့အမွေအနှစ်နေရာများ စာရင်းတွင် ထည့်သွင်းထားသည်။ မီတီအိုရာ ဆိုသည်မှာ မြင့်မြတ်ခြင်း၊ မြင့်မားခြင်းဟု အဓိပ္ပာယ်ရပြီး စကားလုံးအဓိပ္ပာယ်အရ ဥက္ကာပျံနှင့် ပတ်သက်သည့်အရာဟု ဆိုသည်။

အဆိုပါ ဘုရားကျောင်းများ တည်ဆောက်ထားသော ကျောက်တောင်များသည် လွန်ခဲ့သောနှစ်ပေါင်း သန်းခြောက်ဆယ်ခန့်က ကမ္ဘာပေါ်တွင် မြေမျက်နှာပြင် လှုတ်ရှားမှုများစွာကြောင့် ပင်လယ်ကြမ်းပြင်ကို အထက်သို့ မြင့်တက်စေခဲ့ပြီး ကုန်းမြေမြင့်များကို ဖြစ်ပေါ်စေခဲ့သည်။ ထို့နောက် ရေ၊ လေနှင့် အပူချိန်လွန်ကဲသည့် ရာသီဥတုတို့ကြောင့် ကြီးမားသောကျောက်တောင်ကြီးများသည် ဒေါင်လိုက်ဖြစ်ပေါ်လာခဲ့သည်။ သိ့စလီလွင်ပြင် အနောက်ပိုင်းဒေသရှိ ပင်းဒတ်တောင်တန်းများအနီးတွင် ထူးခြား၍ ကြီးမားသော ကျောက်တုံးကျောက်တောင်ကြီးများသည် မြေပြင်မှ အလျင်အမြန် ထွက်ပေါ်လာပြီး ၎င်းတို့၏ ထူးခြားသောပုံစံသည် ဘူမိဗေဒဆိုင်ရာအရ ရှင်းပြရန် မလွယ်ကူဘဲ ပုံမှန်အားဖြင့် မီးသင့်ကျောက်များ၏ မီးတောင်အပေါက်များ မဟုတ်သော်လည်း အဆိုပါကျောက်တုံးများသည် သဲကျောက်အရောအနှောများဖြင့် ဖွဲ့စည်းထားသည်။

ကာလမ်ဘာကာမှ နှစ်မိုင်ခွဲခန့်အကွာတွင် ရှေးဦးလူသားတို့ နေထိုင်ခဲ့သည့် သီအိုပီထရာလှိုဏ်ဂူ တည်ရှိသည်။ ထိုလှိုဏ်ဂူကြီးသည် သီအိုပီထရာရွာ၏ အထက် အရှေ့မြောက်ဘက်တွင် အလျား ၅၆-ပေ၊ အကျယ် ၉.၈-ပေ အထိ ဝင်ပေါက်ရှိသည့် ထုံးကျောက်တောင်ခြေရင်း၌ စတုရန်းပေ ၅၄၀၀ ခန့် ကျယ်ဝန်းသော စတုဂံပုံ လှိုဏ်ဂူတစ်ခု ဖြစ်သည်။ ရေဒီယို ကာဗွန်နည်းအရ လွန်ခဲ့သောနှစ်ပေါင်း ၅၀၀၀၀ ကျော်ခန့်က လူသားတို့နေထိုင်ခဲ့ခြင်းကို သက်သေပြနေသည်။