Arte
Arte (Afkörten för Association Relative à la Télévision Européenne) is en Feernsehsenner mit Sitt in Straßborg (Hööfttseet) un Baden-Baden, de in düütsch-franzöösche Kooperatschoon bedreven warrt. Arte is 1992 dör en Staatsverdrag twischen den franzööschen Staat un de düütschen Bundslänner grünnt worrn un füng in’n Mai 1992 an, sien Programm uttostrahlen.
Arte warrt in Düütsch un Franzöösch in ganz Europa över Satellit utstrahlt. Dat Programm kunzentreert sik op Kultur, Europa un dat Vermiddeln vun Informatschonen ut faken ungewohnte Perspektiven.
Arte hett in Frankriek en grötteren Marktandeel (3,8 %) as in Düütschland (ünner 1 %, Stand je Anfang 2005). Dat mag to’n Deel doran liggen, dat de Senner in Düütschland en veel gröttere Konkurrenz hett as in Frankriek, wo dat blot fief analoge Feernsehsenner gifft, de free to kriegen sünd.
Arte hett 365 faste Mitarbeiders un en Etat vun üm un bi 360 Millionen Euro in’t Johr (Stand 2005). De Senner is bekannt för qualitativ gode Dokumentatschonen un en originell Sennerdesign un hett dorför un för sienen Bidrag to de europääsche Integratschoon al vele Priesen kregen.
Arte hett de Rechtsform vun en Europäische Wirtschaftliche Interessensvereinigung. De Liddmaten sünd ARTE France un de ARTE Deutschland TV GmbH, an de ARD un ZDF je de Hälft Andeel hebbt.
Assozieerte Senner sünd: RTBF in’t franzöösche Belgien, SRG SSR idée suisse in de Swiez, TVE in Spanien, TVP in Polen, ORF in Öösterriek, YLE in Finnland, NPS in de Nedderlannen, BBC in Grootbritannien un SVT in Sweden.
Weblenken
[ännern | Bornkood ännern]- arte-tv.com Websteed vun’n Senner (hoochdüütsch, franzöösch)
