Jacques Hanegraaf

Jacobus Johannes Henricus „Jacques“ Hanegraaf (* 14. Dezember 1960 in Rijsbergen) is en ehmalger nedderlannsch Radrennfohrer un later Sportlich Baas.

Sportlich Loopbahn

1980 is Jacques Hanegraaf, en Enkel van den Radrennfohrer Marinus Valentijn, bi de Olympisch Spelen in Moskau antreeden; he keem dorbi sowohl in dat Straatenrennen as ok mit de Mannschap jewiels up den 15. Platz.

Loopbahn

1981 is Hanegraaf denn Profi wurrn. Glieks in sien eerst Profi-Johr wurr he nedderlannsch Straatenmeester, wat he 1985 noch mal wurrn is. 1982 wunn he dat Rennen Paris–Brüssel as ok 1984 dat Amstel Gold Race un de Acht van Chaam. Dreemal hett Hanegraaf an de Tour de France deelnommen un 1984 droog he dorbi twee Daag lang dat Geel Trikot van den Gesamtführenden.

Nah sien Loopbahn

1992 muss Hanegraaf sien aktive Radsport-Karriere nah en swooren Unfall bi dat Training, bi de he sück mehrere Rüggwirbel braaken harr, afsluuten. Nahdem he sück dorvan lang Tiet verhaalt harr, hett he de PR-Arbeit för dat „Team Telekom“, för dat he toletzt ok fohren weer, övernommen, weer för de ASO, de Organisatorin van de Tour de France tätig, un hett Rennrööd importeert. Af 2000 weer he sportlich Baas van „Farm Frites“, af 2003 van „Bianchi“, dat Team um Jan Ullrich, as ok 2009 van „Cycle Collstrop“. Ansluutend weer he Manager för Rennfohrer, dorünner Thomas Dekker un Stef Clement.

2016 hett de ehmalge Rennfohrer Thomas Dekker gemeensam mit den Journalisten Thijs Zonneveld sien Autobiografie Mijn Gevecht herutbrocht, in de he Hanegraaf beschuldigen dee, hüm to’n Doping upmuntert as ok mit den Madrider „Dopingdokter“ Eufemiano Fuentes bekannt maakt to hemm. Todem harr Hanegraaf hüm tegenöver inrüümt, sülvst mit Drogen experimenteert to hemm. Hanegraaf hett dat as „totalen Quatsch und reine Verleumdung“ beteekent. Dekker stunn bi hüm noch mit völ Geld in’n Kried un harr versöcht, hüm to erpressen, so Hanegraaf, de Dekker up en Betallen van 90.000 Euro verklaagen dee.^[1] Dat Gericht hett de Klaag in’n März 2017 afwiest un hett in dat oordeel faststellt, dat Zonneveld de Angaaven van Dekker över Hanegraaf gründlich verifizeert harr un dat „die journalistische Recherche, einschließlich der Verzweigungen, hinreichend sorgfältig“ ween weer.^[2]