Mercury Rising

Filmdaten
Plattdüütsch Titel:	—
Originaltitel:	Mercury Rising
Düütsch Titel:	Das Mercury Puzzle
Produkschoonsland:	USA
Johr vun’t Rutkamen:	1998
Läng:	108 Minuten
Originalspraak:	Engelsch
Öllersfreegaav in Düütschland:	FSK 16
Filmkru
Speelbaas:	Harold Becker
Dreihbook:	Lawrence Konner Mark Rosenthal
Produkschoon:	Brian Grazer Karen Kehela
Musik:	John Barry
Kamera:	Michael Seresin
Snitt:	Peter Honess
Szenenbild:	Patrizia von Brandenstein
Kledaasch:	Betsy Heimann
Dorstellers
Bruce Willis: Art Jeffries Alec Baldwin: Lt. Col. Nicholas Kudrow Miko Hughes: Simon Lynch Chi McBride: FBI-Agent Thomas „Bizzi“ Jordan Kim Dickens: Stacey Siebring Robert Stanton: Dean Crandell Bodhi Elfman: Leo Pedranski Carrie Preston: Emily Lang Lindsey Ginter: Peter Burrell Peter Stormare: Stayes Kevin Conway: FBI-Chief Joe Lomax John Carroll Lynch: Martin Lynch Kelley Hazen: Jenny Lynch

Mercury Rising (op plattdüütsch so veel as „Opstiegen Quecksülver“; dt. Titel: Das Mercury Puzzle) is de Titel vun en US-amerikaanschen Thriller ut dat Johr 1998, in den Bruce Willis de Hööftrull speelt. Dat Dreihbook baseert op den Roman Simple Simon vun Ryne Douglas Pearson. Speelbaas weer Harold Becker.

Inholt

De US-amerikaansche Geheemdeenst NSA hett en ne’en Geheemkood mit den Decknaam „Mercury“ (engelsch för Quecksülver) utklamüstert, de vun keen Minsch un vun keen Reekner to knacken wesen schall. Man, üm seker to gahn, versteekt de Programmerers en mit den Kood verslötelte Naricht in en Radelsheft. Wokeen dat Radels lööst, finnt ut den Kood en Telefonnummer, woneem man anropen schall. Aver nümms glöövt, dat jichtenseen dat Radels lösen kann.

Man, dat Radelsheft kummt in de Hand vun den negenjohrigen Simon, de Autist is un sünnere intellektuelle Gaven hett. Em fallt dat nich swoor, den Kood to knacken un röpt de Telefonnummer an. De Bedeeligten bi’n Geheemdeenst sünd schockeert un mellt den Vörfall jemehrn Baas Lt. Col. Kudrow, de vun de Akschoon nix wüsst hett. Kudrow sütt in den Jungen en Sekerheitsrisiko, vunwegen dat he de eenzige is, de den Kood knacken kann. En Opdragskiller söcht de Familie op un schütt de Öllern ahn Geweten doot. Simon kann sik aver versteken, bit de Killer utneihn mutt.

Op den Fall warrt de FBI-Agent Art Jeffries ansett, de bi en fröheren Insatz nich hinnern künn, dat twee an en Roov bedeeligte Kinner dootschaten worrn sünd. Dör en Tofall finnt Jeffries den Jungen in sien Versteek. Simon warrt in en Krankenhuus bröcht. As man Jeffries vertellt, dat de Jung op Anwiesen vun sien Öllern verleggt warrn schall, is em kloor, dat wat fuul is. He ahnt, dat annerseen achter den Jungen her is. Üm em to schulen, bringt he em ut dat Krankenhuus rut. So eenfack is dat aver nich, vunwegen dat de Autist Simon in sien egen Welt leevt un sien Verhollen nich berekenbor is. Jeffires dröff em nich een Sekunn ut de Ogen laten. Dorto kummt, dat em bi’t FBI nümms glöövt, dat Simon in Gefohr is. In’n Gegendeel warrt bald na em söcht, as de verdacht op em fallt. Mit Hülp vun Stacey, de he dör en Tofall drapen hett, kann Jeffreys den Jungen en Tiet lang versteken.

Kudrows Methoden stööt aver ok een vun sien Mitarbeiters op, de sik mit Jeffries drapen deit, üm dat Leven vun den Jungen to redden. Wiel dat Drapen warrt de Mitarbeiter aver vun den Killer Burrell an de Siet maakt. Un ok de tweete Kryptoloog vun dat Projekt warrt ümbröcht, as he en Breef an Jeffries un an de US-Behörden schrieven will. Sien Fründin wennt sik an Jeffries un gifft em dat Dörslaggpapeer, dat de Möörder in’n Papeerkorf översehn hett.

Burrell is bi een vun de Moorden aver op en Kamera nahmen worrn. En Kolleeg vun Jeffries kann den Killer as en Offizeer vun en Sünnereenheit identifizeren, de al vör Johren ümkamen wesen schall. Tosamen mit dat Dörslagpapeer vun den Breef, den de Kryptoloog schrieven wull, kann Jeffries de Veratnwoortlichen vun’t FBI opletzt övertügen. Kudrow un Burrell warrt in en Fall lockt un vun de FBI-Beamten an de Siet maakt. Simon warrt an’t Enn vun en Pleegfamilie opnahmen.

Kritik

De Kritiken to den Film weern eher slecht, wobi vör allen de Geschicht sülvst as swoor to glöven kritiseert weer. En poor Kritikers loven aver de Leistung vun Miko Hughes in de Rull vun dat autistische Kind.

• Ramona Thomasius schreev op cinema.de, dat ok Bruce Willis den Film nich redden künn. De Plaan, en Geschicht över en autistisch Kind mit explosive Action to verknütten schein to hooch grepen. Dat Resultat weer as wenig originell un op snaaksche Oort ahn Spannung beschreven.

• Op Moviemaster.de warrt de Film as grootordig besett besnackt, man, dormit harr sik dat ok al. De Inholt weer so winnig, dat een bi’t Tokieken seekrank warrn künn. De Figuren harrn – mit ’n poor Utnahmen – nich mol in’n Ansatz realistische Töög un ok de Slusssequenz schree na’n Himmel.

Utteken

De Film mit twee Filmpriesen uttekent worrn:

• 1991: mit den Razzie Award in de Kategorie Slechtst Schauspeler för Bruce Willis
• 1991: mit den Young Artist Award in de Kategorie Best Dorstellen in en Speelfilm – Hööftdorsteller för Miko Hughes

Weblenken

• Mercury Rising in de Internet Movie Database (engelsch)