Patrick Leclercq (Journalist)

Patrick Leclercq (* 21. Januar 1950 in Baden-Baden; † 15. Januar 2011 in Kairo) weer en düütschen Journalist un Korrespondent vun de ARD för den Negen Oosten.

Leven

Patrick Leclercq, de Söhn vun en düütschen Fro un en franzööschen Mann, hett toeerst an de Berliner Filmakademie studeert. As he sien Studium afbroken hett, füng he 1973 mit sien Loopbahn as Journalist an un weer toeerst Reakteur un Reporter bi’n dormoligen Süüddüütschen Rundfunk (SDR) in Stuttgart. In de Lokalredakschoon in Tübingen weer he as fre’en Mitarbeiter dorbi.

Vun 1982 an hett Leclercq för de ARD as Sünnerkorrespondent ut’n Negen Oosten bericht un weer Berichterstatter över den libaneeschen Börgerkrieg. 1985 is he Leider vun de SDR-Utlandsredakschoon worrn. Dorna weer he as Feernsehkorrespondent för dat süüdliche Afrika in’t Utland un af 1988 för den Negen Oosten in Kairo. 1991 hett he ut Saudi-Arabien un Kuwait över den Tweete Golfkrieg bericht.

In’t Johr 1995 keem he torüch un övernehm 1996 dat Regeer vun’t Rebeet Feernsehn/Binnenpolitik vun de ARD. Af 1999 weer he för den Süüdwestrundfunk Tweete Baasredakteur vun ARD-aktuell, also de zentrale ARD-Narichtenredakschoon, de för de Tagesschau un de Tagesthemen tostännig is. Af 2003 weer he för den SWR Moderater vun’n Weltspiegel. Vun’n 1. August 2005 bit to sien Utscheden vun wegen sien Krankheit in’n Sommer 2009 weer Leclercq Korrespondent vun de ARD för den Negen Oosten mit Sitt in Kairo.

Leclercq weer mit de Ägypterin Iman Leclercq verheiraat un is dorför to’n Islam övertreden. Ut de Eh stammt twee Kinner. He is na lange Krankheit doodbleven.

Weblenken

• Lebensgefahr als Job-Alltag: Vom Nahen Osten nach Tübingen: Patrick Leclercq prägt die Berichterstattung aus der arabischen Welt (hoochdüütsch)