Dagfinn Instanes
| Dagfinn Instanes | |
| Fødd | 24. oktober 1919 |
| Død |
1998 (78 år) |
| Yrke | illustratør |
Dagfinn Instanes (1919–1998) var ein norsk biletkunstnar og keramikar frå Grimo i Ullensvang herad.
Biografi
[endre | endre wikiteksten]Dagfinn Instanes voks opp på Grimo med fire sysken. I konfirmasjonsgåve fekk han eit trekkspel, han lærte seg notar på eiga hand og spela fleire melodiar.[1] Seinare gjekk han i målarlære i Norheimsund. I åra 1938 - 39 gjekk han så på Statens Husindustriskule på Haus på Osterøy. Frå 1942 - 1946 gjekk han på keramikklinja ved Statens håndverks- og kunstindustriskole i Oslo. Etter dette flytte han heim til Grimo. På femtitalet byrja han å delta i fellesutstillingar, og i 1956 hadde han si fyrste separatutstilling i Vestlandske Kunstindustrimuseum. Same året hadde han eit stipendiert studieopphald i København.[2]
Instanes var ein allsidig kunstnar. I 1987 debuterte han som barnebokforfattar med Folen blakk utan sal og sele (Eide Forlag) [3] der han sjølv hadde både skrive dikta, illustrert og sett tone til dikta. Elles var han både styremedlem og styreformann for Hardanger Folkemuseum i mange år, og gjorde sitt til at muséet mellom anna fekk tunet modernisert. Instanes hadde sine to siste separatutstillingar på muséet, i 1983 og 1988.
Dagfinn Instanes døydde i ei bilulukke i 1998. Han etterlet seg ein del komposisjonar og songar som vart utgjevne på cd-en Songar frå mitt ringe strengespel frå 2002 av musikarane Reidun Horvei, Øyvind Lyslo, Laila Kolve, Jo-Asgeir Lie, Olav Tveitane og Ole Hamre.[4] Det er laga eit relieffportrett av Instanes som står på Hardanger Folkemuseum. Kunstnaren er Arne Mæland.[5]
Verk og utsmykkingar
[endre | endre wikiteksten]- Keramikkrelieff på Odda Sjukehus.
- Keramikkrelieff på Eidfjord Samfunnshus.
- Keramisk figur, Kinsarvik Skule.
- Vaksdal skule
- Fana folkehøgskule
- Hauso samfunnshus, Ullensvang
- Hauso skule
- Lægreid skule, Eidfjord
- Altertavle, Eidfjord kyrkje
- Statoil, Bergen
- Bronserelieff til minne om Olav Kolltveit, Hardanger Folkemuseum.
- Biletteppe, Heradshuset i Kinsarvik.
Referansar
[endre | endre wikiteksten]- ↑ Dag og Tid, 22. februar 2003: Viser som går stilt i dørene., arkivert frå originalen 17. desember 2012, henta 28. januar 2011
- ↑ Oddmund Hus: Keramikar og kunstnar Dagfinn Instanes (1919 - 1998), arkivert frå originalen 5. mars 2016, henta 28. januar 2011
- ↑ Folen blakk utan sal og sele på Bokelskere.no
- ↑ LYslo.net om Songar frå mitt ringe strengespel, arkivert frå originalen 27. august 2008, henta 28. januar 2011
- ↑ Kulturnett.no: Dagfinn Instanes
