Teamfehla

Dialegd: Schbaimarisch

De Teamfehla ischn Fehla, wu uffdreede konn, wonn Laid zommeschaffn. Ma kennd deng'ge, dasses wonn viel Laid on ebbes zommeschaffn, dass onn a was gschaids raus kummd, awwa des ischn Drugschluss. Meschanisme, wie zum Baisbiel Abhängischkaide zwischede Laid erhehd die Wahschoinlischkaid, dass ebbes nedd guud laafe dud. Äni vun dene Meschanisme ischde Obbasunddrugg, wu Laid fiele kennen, wonn ä Mehrhaid ä Meenung hodd, a womma wes, dasses falsch isch.

Baischbiel

Pilod/Kopilod Fehla

Im Janua 1982 isches uffm Washington National Airport middm Fluuch „Air Florida Flight 90“ zu soem Fehla kumme.^[1] S'Fluuchzaisch hoddma nedd gschaid vum Ais b'fraid kabd unnde Schnee hoddsisch uffde Flischl ogsommeld. Währendem Iwwabriefe vunde Pungd vorm Abliesche, hodde Kopilod gsachd “engine anti-ice system". Die Kapitän hodds engeschegnumme unn a gsachd “engine anti-ice system off”, awwa donn die Endaisung nedd ogschdelld wies hedd soi misse. Deswesche hodd donns Ais des "engine pressure ratio (EPR)" Sischdem gschderd. De Kopilod hodd donn de Kapitän minischdens finfmol dodruff hieg'wiese, awwa hodd sisch nedd de Endschaidung vum Kapitän widdasedzd, loszufliesche. Des hedda awwa due misse unn druff bschdeje misse de Schdaadd abzubresche, wails Sischdem og'zaischd hodd, dass do was falsch isch. Des Fluchzaisch isch abgschderzd unn dobai sinn 74 vunde 79 Laid umkumme.

Uglahaid vunde Vaondwordung

Inna Brodugzionsschdedd vum US-Enagieminischderium End vunde 1980er Johr^[1] hodde Schischdlaida zomme midd onnare gblond ä defegdi Bumb auzuwegsle, wasse donn a gmachd worre isch. Awwa die Kondroll vunde Erwed isch falsch g'loffe. S'hoddn Drugg vum Zaidblon gewwe, weswesche die Männa die Erwede selbschd in die Hond g'numme hawwen unn do'd'midd gesche die Reschle vschdossen hawwen, weilse ganedd do'd'vor ausgbild gwesd sinn. Im Team hawwense broblemlos gesche Awaidsabläuf, Gwalidedsbriefunge, Zerdifizierunge unn G'wergschafdsreschle vaschdosse. Allä heddense kaum je so ebbes gmachd, wozuse ganedd gwalifizierd sinn, awwa inde Grubb hoddma die Reschle ausa Grafd gsezd.

Fehlavamaidung

De Teamfehla komma vamaide wies im "DOE Human Performance Improvement Handbook"^[1] bschriwwe isch.

Ferdere vunde Fraihaid vunde G'dong'ge vunde Teammidglieda.
Ma sold die Agzione unn Endschaidunge vun onnare imma gridisch gseje, um drunnalischende Onohme zu finne.
Die Laid missn drainierd werre, domidse wissn wodursch de Teamfehla bassierd unn wiemons vahinnare konn.
Die Laid missn on Team-Trainings dailnehmme.
Iewe vum Hinnafroche vunde Oischdellunge unnem B'wussdsoi inde Siduazione om Awaidsbladz.
Bschdimme vunnem Daifls Advokaad fa Siduazione, wus Lesunge brauchd.
Bschdimm Unnabrisch umen Team zu helfe, ä gmoinsoms Vaschdendnis iwwade Schdadus vunde Erwedd zu krische.
Vorde Erwedd brauchdsn grindlische Iwwabligg, ä Briefing, iwwa die Uffgawe.

Gugschd a uff

DOE-HDBK-1028-2009, Human Performance Improvement Handbook
Responsibility Diffusion in Cooperative Collectives; Virginia Commonwealth University Donelson R. Forsyth; Linda E. Zyzniewski; U.S. Coast Guard Academy, Cheryl A. Giammanco.
Collective Failure: The Emergence, Consequences, and Management of Errors in Teams, Cornell University, Bradford S. Bell; Steve W. J. Kozlowski

Vawais

↑ ^1,0 ^1,1 ^1,2 DOE-HDBK-1028-2009, Human Performance Improvement Handbook. https://www.standards.doe.gov/standards-documents/1000/1028-BHdbk-2009-v1

[auto-1] 1,0 ^1,1 ^1,2 DOE-HDBK-1028-2009, Human Performance Improvement Handbook. https://www.standards.doe.gov/standards-documents/1000/1028-BHdbk-2009-v1

[1]