Blagodarnii

Blagodarnii
Благодарный

Lidnanznam	Flag
Valdkund	Venäma
Eläjiden lugu (2023)	30,713 ristitud
Pind	24 km²
Telefonkod	+7−86 549-xx-xxx
Avtokod	26, 126
Aigvö	UTC+3 (MSK+0)

Blagodarnii (ven.: Благода́рный) om Venäman lidn Stavropolin randan keskuzpalas. Se om Blagodarnijan lidnümbrikon (edel 2017. vot — rajonan) administrativine keskuz.

Istorii

Lugetas 1782. vot eländpunktan alusenpanendan oficialižeks vodeks, zavottihe Soldatskoje-žiloks. 19. voz'sadal nimitihe sidä Blagodarnoje-žilo-ki (ven.: село Благодарное), kaks' nimed oli ühtel aigal. Vspäi 1900 kätihe makundan keskuseks. Vozil 1920−1922 Blagodarnii oli i vn 1971 9. päiväspäi sügüz'kud om lidnan statusanke.

Blagodarnijan ižandusen päsarak om sömtegimišt: lindkombinat, villänpurnud, leibän edheotand, maidon kompanii, «Agroprodukt».

Geografijan andmused

Lidn sijadase Märg Buivol-jogen randal (ven.: Мо́края Буйвола́, Kumanjogen hura ližajogi), Stavropolin ülüdel, 160 m ü.m.t. keskmäižel korktusel.

Matkad Stavropolihesai om 115 km päivlaskmha orhal vai 150 km avtotedme. Lähembaine lidn om Svetlograd vižkümnes kilometras lodeheze orhal, raudtedme vai 67 km avtotedme.

Tobmuz

Blagodarnijan lidnankund om tühjitadud vn 2017 1. päiväl semendkud, sen pind oli 30,61 km².

Lidnankundan tobmuden pämez' oli sen Administracijan pämez'. Jäl'gmäine lidnan Administracijan pämez' oli Dmitrii Tormosov (tal'vku 2015 — sulaku 2017), edeline — Svetlana Lobkareva (2011−2015).

Eläjad

Vn 2010 Venäman rahvahanlugemižen mödhe lidnan eläjiden lugu oli 32 725 ristitud, rajonan ristitišton pol', vn 2021 — 30 827 ristitud. Vl 2017 lidnan ristitišt oli 31 293 eläjad. Kaikiš suremb lidnan ristitišt oli läz 34 tuhad eläjid vozil 1998−2005 (34 500 ristitud vll 2002−2003).

Rahvahad (enamba 1 % vl 2010): venälaižed — 81,8 %, čiganalaižed — 7,5 %, armenijalaižed — 3,6 %, turkad — 1,8 %, toižed rahvahad — 5,0 %, rahvahuden ozutandata — 0,3 %.

Ortodoksižen hristanuskondan nell' pühäpertid oma avaitud lidnas: Aleksandr Nevskijan jumalanpert', Tazostadud apostolha Vladimiran jumalanpert', Venäman uziden moknikoiden da hengenavaidajiden pühäpert'-časoun', Kosman i Damianan časoun', mugažo Pedran da Fevronijan jumalanpert' om sauvomas.

Lapsiden opendusen aluzkundad oma kahesa päivkodid (nomer 2, 3, 5, 7, 9, 28..30), specialine (korrekcine) päivkodi-augškol (nomer 1), nell' keskškolad (nomer 1, 6, 9, 15), lapsiden sädamižen pert', čomamahtoiden škol, lapsiden da norišton sportškol. Blagodarnijan agrotehnine tehnikum om lidnan professionaližen opendusen aluzkundaks.

Transport

Avtobusad oma kundaližeks transportaks lidnas.

«Svetlograd — Budönnovsk»-avtote i raudte läbitadas lidnad. Raudtestancii om Blagodarnoje-nimenke, raudte radab ajamha jüguid vaiše.

Irdkosketused

• Lidnan da sen ümbrikon tobmuden sait (abgosk.ru). (ven.)
• Blagodarnii-lidnan tobmuden aluzkundoiden oficialine sait (gorodblag.ucoz.ru). (ven.) (andmused vhesai 2017)