ლეო შტრაუსი

ლეო შტრაუსი
	ლეო შტრაუსი
	გერმ. Leo Strauss
	; ლეო შტრაუსი 1939 წანას
დაბადებაშ თარიღი:	20 ეკენია, 1899
დაბადებაშ აბანი:	კირხჰაინი, ჰესენ-ნასაუშ პროვინცია, პრუსიაშ ომაფე, გერმანიაშ იმპერია
ღურაშ თარიღი:	გჷმათუთა 18, 1973 (74 წანერი)
ღურაშ აბანი:	ანაპოლისი, მერილენდი, ააშ
მენოღალობა:	გერმანია; ააშ
ომენცარე სფერო:	მეტაფიზიკა, ეპისტემოლოგია, ფილოსოფიაშ ისტორია, რელიგიაშ ფილოსოფია, პოლიტიკური ფილოსოფია
სამუშაშ აბანი :	კოლუმბიაშ უნივერსიტეტი; კემბრიჯიშ უნივერსიტეტი; ახალი სკოლა; ჰამილტონიშ კოლეჯი; ჩიკაგოშ უნივერსიტეტი
ალმა-მატერი:	მარბურგიშ უნივერსიტეტი; ჰამბურგიშ უნივერსიტეტი; ფრაიბურგიშ უნივერსიტეტი; კოლუმბიაშ უნივერსიტეტი
ომენცარე ხემანჯღვერი:	ერნსტ კასირერი
ჯოხოშინელი მოგურაფეეფი:	პიერ ასნერი
ჯილდოეფი დო პრემიეფი:

ლეო შტრაუსი (გერმ. Leo Strauss; დ. 20 ეკენია, 1899, კირხჰაინი, ჰესენ-ნასაუშ პროვინცია, პრუსიაშ ომაფე, გერმანიაშ იმპერია — ღ. 18 გჷმათუთა, 1973, ანაპოლისი, მერილენდი, ააშ) — გერმანალი-ამერიკალი პოლიტიკური ფილოსოფოსი.

ბიოგრაფია

ლეო შტრაუსიქ დებადჷ 1899 წანაშ 20 ეკენიას, გერმანალი ურიეფიშ ფანიას. გურაფულენდჷ მარბურგიშ უნივერსიტეტის, ნამუთ გათუ 1917 წანას. მაართა მოსოფელიშ ლჷმაშ ბორჯის შტრაუსი მსახურენდჷ გერმანიაშ არმიას, 1917 წანაშ კვირკვეშე 1918 წანაშ ქირსეთუთაშახ.

ლჷმაშ თებაშ უკულ, შტრაუსიქ გურაფა გაგინძორჷ ჰამბურგიშ უნივერსიტეტის, სოდეთ თხილუ ოდოქტორე დისერტაცია 1921 წანას, ერნსტ კასირერიშ ხემანჯღვერობათ. ოდოქტორე თეზისიშ თემა რდჷ "რჩქინაშ პრობლემაშ გეშა ფრიდრიხ ჰაინრიხ იაკობიშ ფილოსოფიურ დოქტრინას".

ართი პერიოდის შტრაუსი გურაფულენდჷ ფრაიბურგიშ უნივერსიტეტის ხოლო, სოდეთ თიში მაგურაფალეფი რდეს: ედმუნდ ჰუსერლი დო მარტინ ჰაიდეგერი.

1932 წანას როკფელერიშ ფონდიშ სტიპენდიათ შტრაუსიქ პარიზიშა მიდართჷ. გერმანიაშ თარობაშა ნაცისტეფიშ მულაშ უკულ, შტრაუსის გერმანიაშა ვადურთინჷ დო ოცხოვრებშა ბრიტანეთიშა გეგნორთჷ დო მუშობა ქიდიჭყჷ კემბრიჯიშ უნივერსიტეტის. 1937 წანას ლეო შტრაუსიქ ოცხოვრებშა ამერიკაშა გინილჷ. ჸათაქ თიქ იმუშუ შხვადოშხვა ომენცარე ინსტიტუტეფს: დიო კოლუმბიაშ უნივერსიტეტის, უკულ ჰამილტონიშ კოლეჯის დო უკულ ჩიკაგოშ უნივერსიტეტის.

ფილოსოფია

შტრაუსიშ აზრით პოლიტიკა დო ფილოსოფია რე ართიანს მერსხილი დო პოლიტიკურ ფილოსოფიაქ გიჭყჷ ჸეთი ბორჯის, მუჟამს სოკრატე გასამართლეს დო დოჸვილეს. შტრაუსიშ აზრით ფილოსოფიაშ ისტორიას არძაშე უმოსო შანულამი რდჷ სოკრატეშ არგუმენტეფი, ნამუეფიშ მეჯინათ სოკრატე თვალუნდჷ ნამდა ფილოსოფოსეფს ვეშულებუნა ორთაშ რკვიება ადამიერეფიშ ორთაშ გჷმორკვიებაშ უმუშო.

შტრაუსი, მუში ართი ნახანდის "ორთაშობური ნება დო ისტორია", აკრიტიკენს მაქს ვებერიშ ეპისტემოლოგიას, ეთმოჭარუნს მარტინ ჰაიდეგერიშ რელატივიზმის დო ორთაშობური ნებეფიშ ევოლუციას ტომას ჰობსიშ დო ჯონ ლოკიშ ანალიზით. შტრაუსი, თაშნეშე აკრიტიკენს ჟან-ჟაკ რუსოს დო ედმუნდ ბერკის. წინგის, შტრაუსი ციტირენს პლატონს, არისტოტელეს დო ციცერონს.

შტრაუსი ჭარუნს ნამდა ჰაიდეგერიშ აზრეფი გაგებულქ დო თაშნეშე გაკრიტიკებულქ ოკო იჸუას თეხანური პოლიტიკური თეორიაშ ფორმულაციაშახ. თენა შანენს თის ნამდა პოლიტიკური აზრი ოკო მეჸუნდას ონტოლოგიურ პროცესეფს დო მეტაფიზიკაშ ისტორიას.

ლეო შტრაუსის ფრიდრიხ ნიცშე მიოჩქუდჷ პირველ ფილოსოფოსო ნამუთ სწორას გებულენდჷ ისტორიზმის.

შტრაუსიქ 1953 წანას მიშეღჷ ტერმინი Reductio ad Hitlerum, ნამუთ შანენს ჸეთი არგუმენტიშ ნიველირებას, ნამჷ არგუმენტით შილებე უღუდუკონჷ ადოლფ ჰიტლერს ვარდა ნაცისტურ პარტიას.

ლეო შტრაუსი რე ავტორი 15 წინგიშ, შხვადოშხვა სტატიეფიშ დო ფილოსოფიური პუბლიკაციეფიშ. დიდი პოპულარობა მიპალუ ჸეთი წინგეფქ დო სტატიეფქ ნამუეფით ორხველუდჷ სპინოზას, ჰობსის, მაიმონიდის დო ალ-ფარაბის.

რესურსეფი ინტერნეტის