ჸომური

ჸომური (ლათ. Prúnus cerasiféra) — მიარეწანიანი ხილამი ჩანარი ვარდიშობურეფიშ ფანიაშე წკამეფიშ გვარიშე. ჯაშ სიმაღალა 3-10 მ-შახ ონჭუ, კანკალეშა ჯაშმოგვენი ბართვი რე, ჯგირო დოჸალერი, ძიგირამი ვარ-და უძიგირე. გუმნაღელი მორგვალე, მობირტყე-მორგვალე ვარ-და მარქვალიშბური უღუ. ფერო ჸვინთელი, ჭითა დო იაიაშფერი რე, მინშა უჩა. დიხაშო მერკეთ მუმათხუალი რე, დალახებეფშოთ ჩებეკი, გოლოფა- დო ჸინგუმარძე. მოსალობა ძინათებული ჯაშე 300 კგ-შახ რე.

მეხილობაშ გიმირინაუნა დამაზიშ, ატმაშ დო მარგულიშ ოჯინჯეთ. ტყას დო კულტურას გოფაჩილი რე ბალკანეთის. შქა დო მორჩილი აზიას, ირანს, მოლენკავკაციაშ დო შხვა.

საქორთუოს უჯვეშაში ბორჯიშე ირდიხას რე გოფაჩილი ზუღაშ დონეშე 1600-1800 მ-შახ. ასე დორაიონაფილი ჯიშეფი რე გულდედავა, აფუნიშ მაჭირხოლი, ჭითა შილა, ქუთეში, რიონი, ხვეიანი დო შხვა.

ჸომურს ქორთულ საგესქუოს შანულამი აბანი უკებუ. ჸომურშე აკეთენა საუჯგუშო ხარისხიშ წვენს, კომპოტის, მურაბას, ორკვანალეფს, რტყაპის დო ჯოხოგოლაფირი კვარწახის, ნამუთ ქორთული სუფრაშ ართ-ართი უნიკალური ატრიბუტი რე.

კულტურული ჸომურიშ გუმნაღელი იკათუანს (%-ობათ): შანქარეფს 4-10, ბჟეფს 1,5-4, პექტინს 0,3-1,5, C ვიტამინს დო A პროვიტამინს.

გალერეა

• 
  მონდა ჭითა ჸომური
• 
  კობუ ჸომური
• 
  ჸომურიშ პიოლეფი

ლიტერატურა

• ვარძელაშვილი მ., ქორთული სხუნუეფიშ ენციკლოპედია, ტ. 10, ხს. 86, ქართი, 1986 წანა.