伯希和

伯希和 Paul Pelliot
伯希和調查緊敦煌莫高窟藏經洞嘅文書、經典（30歲）
出世	1878年5月28號 法國巴黎
死	1945年10月26號 法國巴黎
死因	癌症
國籍	法國
語言	法文 英文 德文 俄文 中文 波斯文 藏文 阿拉伯文 越南文 蒙古文 土耳其文 吐火羅文 梵文
教育程度	大學
職業	語言學者、探險家、漢學家

伯希和嘅探險旅程

伯希和（粵拼：baak3 hei1 wo4；法文：Paul Pelliot；1878年5月28號—1945年10月26號）係法國著名嘅漢學家，亦係中亞探險家，佢收集咗好多文物，將佢哋運去法國，當中最有名嘅係敦煌文獻。最初佢跟住外國使節團入來，從而開始研究中國。佢精通13種語文。伯希和淨單係探查過中亞一次，但就帶來咗好多文物。

初期嘅活躍

伯希和出生喺巴黎，佢係法蘭西公學院嘅東方學者薛旺·李維同沙畹嘅弟子，喺佢哋之下學嘢。之後伯希和去喺法屬印支河內嘅法國遠東學院做嘢，嗰陣時爲咗學院圖書館嘅藏書收集，要購入啲漢籍，1900年派遣佢去北京。喺佢訪問北京期間，發生咗義和團運動，包圍咗北京嘅外國使館區，因而拘禁其中。喺包圍戰期間，伯希和脫出過兩次，一次搶低咗敵軍嘅軍旗，另一次爲圍困嘅人攞新鮮生果。因爲佢嘅勇猛，佢攞到咗法國榮譽軍團勳章。之後，22歲時佢又返到河內，做咗遠東學院嘅漢學教授，之後歷任過法國啲大學嘅教授。

中亞探險

伯希和嘅探險團喺1906年6月17號離開巴黎，向中亞探險。佢嘅隊員有軍醫路易·韋楊（Louis Vaillant）博士、攝影師沙勒·努兀（Charles Nouette）。呢三人經由鐵道，從莫斯科移動到塔什干，入到中屬突厥斯坦地域，1906年8月尾時探險隊到咗喀什，同俄國總督一齊住，停留喺俄國總領事館。伯希和流暢嘅中文驚豔咗當地嘅中國官僚，佢嘅努力好快就見到成果：攞到重要嘅協助同資源，爲探險準備攞到各類便利。

探險隊離開喀什，停泊嘅第一站係圖木舒克，從呢度入到庫車。喺庫車嗰度發現咗多份文書，係用好似婆羅米字嘅文字（後來稱呼做吐火羅文字）寫嘅失傳語言（之後，確認佢係吐火羅文嘅乙種方言龜茲話）。呢啲文書之後畀伯希和嘅老師薛旺·李維解讀出來。

離開咗庫車，伯希和去咗烏魯木齊，喺嗰度探險隊遇到咗瀾國公。瀾國公同佢嘅兄弟都係義和團嘅首魁，所以處於終身流配嘅狀態。伯希和喺佢度見到咗敦煌出土嘅《法華經》古寫本，於是趕赴敦煌。伯希和探險隊最後停腳嘅地方就喺敦煌，就喺嗰度伯希和掙得佢嘅名聲，喺1908年2月12號到達。

喺敦煌伯希和對王圓籙嘅藏經洞有所聞，於是接近佢度。英國探險家斯坦因喺上年1907年訪問過敦煌莫高窟，搦走七千份古文書，流出咗消息，淨低嘅文書仲好多，有份量龐大嘅古書籍同各種版本，以及好多藝術作品。伯希和同看守莫高窟嘅王道士交涉，允許咗佢入藏經洞。喺呢度伯希和流暢嘅中文又再次有用，就好似喺喀什時噉發揮實力。

伯希和用咗三個禮拜去調查藏經洞嘅古文書版本，分析後選出最有價值嘅文書數千卷，就買賣事宜同王圓籙交涉，說服咗佢。王圓籙計劃再建莫高窟，個預算有必要，於是承諾用500兩（約90英鎊）賣出呢個莫大嘅份量。因爲斯坦因唔識中文，佢帶趄歸嘅文書有好多係冇價值嘅嘢，而伯希和通曉包含中文在內嘅13國語種，選出嘅文書冚唪唥都係絕品。當中包含有新發現嘅新羅僧人慧超嘅《往五天竺國傳》。

之後

伯希和一行人喺1909年10月24號返到巴黎，意外噉畀老師沙畹等班遠東學院嘅同僚激烈噉非難，起訴伯希和佢哋浪費公幣而帶返來啲僞造文書，話佢哋有醜惡嘅陰謀。佢哋認爲斯坦因帶走敦煌文書去後，已經乜嘢都冇淨。不過結果喺1912年斯坦因出版咗探險旅行記，公佈話喺敦煌仲有大量文書淨低，對伯希和嘅懷疑先至一天光曬，認證咗佢無罪。

之後，佢發表咗《敦煌千佛洞》等好多研究書，對東方研究有好大影響，喺第一次世界大戰時佢作爲法國武官駐留喺北京，喺1945年因癌症喺巴黎死去。有人評價話「若果冇咗伯希和，漢學會變成孤兒」，公認係漢學嘅偉大學者。巴黎嘅吉美美術館有個畫廊用伯希和起名，佢所寫嘅好多文書都保存喺法國國立圖書館。

意義

伯希和發掘出慧超嘅《往五天竺國傳》係佢嘅核心貢獻，另外佢又翻譯咗周達觀嘅《真臘風土記》入西洋，對吳哥遺蹟嘅復原有莫大嘅貢獻。

榮譽博士

• 香港大學名譽法學博士（1916年）

睇埋

• 斯坦因
• 真臘風土記
• 往五天竺國傳

出面網頁

• 法國所藏嘅敦煌文獻（英文）
• 伯希和嘅視頻介紹（法文）