班佛定律

一個跟從班佛定律嘅數據庫；X 軸係 1 至 9，而 Y 軸係（如果啲數據以十進制嘅數字表示）「喺數值上以嗰個數做開頭嘅個案嘅數量」。

班佛定律（英文：Benford's law），又有叫第一個位定律（first-digit law）喺統計學同相關領域上一種喺現實世界數據當中觀察到嘅現象。如果話一柞有單一變數 $X$ 嘅數據跟從班佛定律（假設啲數值以十進制寫），意思係話喺嗰柞數據入面，有大約 30% 嘅個案喺 $X$ 上嘅數值會係以 1 開頭，而數值嘅開頭數字愈大嘅個案數量就會愈細，得大約 5% 嘅個案喺 $X$ 上嘅數值會係以 9 開頭（下圖）。

實證嘅研究表明，呢種現象喺地址、股票價格同人口數字等多種嘅自然（唔係由人用電腦隨機產生）統計數字當中都可以見得到，不過呢種現象背後嘅成因到咗 2010 年代都仲係一個未解之謎。