端母

端母（粵拼：dyun1 mou5；中古漢語拼音：tuan）係中古漢語聲母，屬舌音嘅端組，係全清聲母。呢個聲母接一、四等韻母，同二、三等嘅知母互補。

其例字如下（中古漢語拼音採用古韻羅馬字）：

擬音

因爲大多數嘅漢語、域外方音、對音中，端母大多發/t/，所以學界一致同意將佢擬音爲/t/。

端母各學者擬音
高本漢	李方桂	陸志韋	董同龢	李榮	王力	邵榮芬	蒲立本	周法高	鄭張尚芳	潘悟雲
t	t	t	t	t	t	t	t	t	t	t

大部分學者都認爲端母字來自上古音嘅/t/音，呢個音喺上古音到中古音嘅演變好穩定。

端母喺現代粵語繼續係古音狀態，對應嘅粵拼係d。對聲調嘅影響係，端母字派入陰聲調。

有個特殊嘅字係鳥，鳥嘅中古音係teux，照計到今日嘅粵音會係diu2，但因爲要避忌「屌」字，呢個字改音爲niu5，用同樣係舌頭音嘅n代替咗d，聲調隨住濁聲母派入陽聲調。

下面係一啲例字嘅古今音對比，第一欄例字，第二欄中古音（切韻），第三欄現代粵音：

調返轉頭，現代粵語中嘅d聲母來源自中古音嘅端、定二母。

端母喺吳語同粵語一樣，維持喺古音狀態，對應嘅吳拼係t。

端母喺普通話同粵語一樣，維持住古音狀態，對應嘅普拼係d。

喺日文，無論漢音定吳音，端母都係た行（[t]／[t͡ʃ]／[t͡s]）。

喺韓文，一等韻嘅端母大多保留古音，讀ㄷ（[t]），如多讀다；少部分送氣，讀ㅌ（[tʰ]），如鬥讀투。四等韻嘅端母由於介音，令聲母塞擦化，變成ㅈ （[t͡ʃ]），如點讀점。