陶藝
陶藝（粵拼：tou4 ngai6；英文：ceramic art）係指用陶瓷整藝術品嘅過程。陶藝出嗰啲成品可以分成兩大類：一類係日常用嘅實用品（functional wares），好似碗碟、樽、盆啊呢啲就係，另一類就唔係整嚟用、齋做裝飾或者完全係藝術品嘅創作（non-functional wares）。整返前一類成品要落足心機，就算係出貨少，都會好似工業設計咁要顧及到譬如易用性呢啲咁嘅問題。
工序通睇
[編輯]做形
[編輯]陶藝嘅第一步係做出個形，而呢個「成形」嘅步驟主要係用三種方法：拉坯[註 1]（throwing）、倒模（slip-casting）同塑捏[註 2]（hand-building）。
拉坯係指用電動嘅拉坯機或者手動嘅製陶轉盤（wheel，行外人叫 potter’s wheel），用手藝將泥坯拉成想整嘅樣，之不過好明顯呢個方法淨係整到圓嘢（或者將圓嘢撳扁或者切割做得出嘅形狀）。注漿[註 3]，即係倒模，係指用水同少量抗絮凝嘅化學添加劑（deflocculant）溝出嚟嘅泥漿（slip），注入預先用石膏製成嘅模，利用咗石膏嗦水嘅特性，喺泥漿畀個模嗦咗幾秒水之後倒走多餘嘅泥漿，再等半乾之後小心攞件嘢出嚟。塑捏就泛指其他嘅成形方法，主要包括手捏[註 4]（pinching）、盤條[註 5]（coiling）同接板[註 6]（slab-building）。
成咗形嘅半製成品首先要冚住佢慢慢風乾，到半乾（leather hard）先可以繼續下一個工序，用刀、剉啲架罉修坯[註 7]（trim）。修坯之後可以再做表面裝飾[註 8]（surface treatment）譬如雕字、雕圖案呢啲。
上釉
[編輯]上釉（glazing）唔算係必要，但係多數都會做，尤其係食具會用佢嚟做防水（炅嘅陶瓷就一定係上咗釉）。之不過，西方傳統手工係一般唔會即刻上釉，而係先經過一個叫素燒（bisquing）嘅低溫燒製工序，將件嘢定咗型先。經呢個工序件嘢就會易啲上釉，同埋若果上釉出咗錯可以用水洗走佢，等風乾之後再上過。
釉（glaze）係一種經過高溫之後會變成玻璃質嘅嘢，佢嘅作用除咗用嚟上色之外，亦都幫成件嘢防埋水。釉喺未燒開前，通常係白白灰灰咁，而未有燒咗之後有嘅色；經燒製嘅過程，係令啲釉發生化學反應，再變色成應有嘅顏色（包括透明）。
雖然釉防到水，但係唔係乜都防。所以做食具通常會揀一啲冇有毒物質嘅釉（譬如，鮮紅嘅釉好可能含鉛，幾十年前仲有用，但係而今經已唔應該用[1]:241）；齋雕塑品就冇呢種顧慮。
上釉並唔係一種 ｢想點就會點｣ 嘅工序，因為釉喺燒嘅過程會變成半流質，甚至喺溫度唔啱或者份量唔啱嘅情形下變成流質，所以通常唔可以完全控制燒成之後啲釉去咗邊。有啲人會利用釉嘅呢種特性做出隨機性嘅效果，但係若果要畫一啲精細嘅畫或者寫字，通常會用釉下彩（underglaze）或者某一啲可以用嘅顏料呢類唔會被個窯燒熔嘅嘢，然後再喺上面加一層透明釉。
上咗釉嘅半製成品首先要風乾，等到乾嗮（bone dry）先燒。
燒成
[編輯].jpg)
燒（firing）係指用高溫嘅電窯（electric kiln）或者煤氣窯（gas kiln）呢啲，用熱力改變泥嘅物理結構再變成陶瓷質地，呢種過程叫玻璃化（vitrification）；之不過燒陶瓷唔係要將啲泥完全玻璃化，反為燒過咗龍，就會令到件製成品出現瑕疵[2]，甚至乎熔鬼咗。
用電窯嘅叫氧化燒（oxidation firing），用煤氣窯、柴窯或者碳窯呢啲嘅叫還原燒（reduction firing）。做陶藝嘅人一般通認為還原燒牽涉到唔同嘅化學反應，所以燒出唔同嘅效果，但係有人指出還原燒其實唔係化學所講嘅還原。[3]
放入窯度燒嘅作品一定要乾透嗮，唔係話啲未乾到過嘅水喺燒嘅時候就變水蒸氣，泥包住冇路走嘅話就爆，咁唔單止嗰件嘢會冇咗，連隔籬嗰啲都會冇埋。
工業應用
[編輯]工業度有半自動化嘅陶藝步驟替代人手，譬如拉坯可以由部自動機嚟拉。工業應用嘅工序譬如風乾方法同燒製嘅先後次序呢啲，好多時同人工做嘅都有唔同。經呢種工業方法出嘅成品，除咗碗碟呢啲嘅一般器皿，仲可以工業生產埋洗手盆、廁盆、瓷磚呢啲。
睇埋
[編輯]參考
[編輯]- ↑ Rossol, Monona (2001). The Artist’s Complete Health and Safety Guide (第3版). New York: Allworth Press. ISBN 978-1-58115-204-3.
- ↑ Finkelnburg, Dave (2016). "Vitrification". Ceramic Arts Network. American Ceramic Society. 喺2022年9月15號搵到.
- ↑ Coppage, Ryan (2022-02-28). "Demystifying the Reduction Firing Process: Defining Reduction Firing to Help Improve Firing Outcomes". Ceramic Arts Network. American Ceramic Society. 喺2022年9月15號搵到.
註釋
[編輯]- ↑ 譯名見：康樂及文化事務 (2016)，頁 12
- ↑ 譯名見：香港藝術館 (無日期)，頁 11
- ↑ 譯名見：康樂及文化事務 (2016)，頁 28
- ↑ 譯名見：康樂及文化事務 (2016)，頁 13
- ↑ 譯名見：康樂及文化事務 (2016)，頁 16
- ↑ 譯名見：康樂及文化事務 (2016)，頁 20
- ↑ 譯名見：〈造型設計：拉坯與模制配件〉。香港藝術學院。原著喺2022年9月15號歸檔。喺2022年9月15號搵到。
- ↑ 譯名見：〈陶藝手捏工作坊 – 形態及表面裝飾處理〉。香港藝術學院。原著喺2022年9月15號歸檔。喺2022年9月15號搵到。
書目
[編輯]- 康樂及文化事務 (2016)。《陶瓷茶具創作2016：07.12.2016–06.11.2017》 (PDF) (展覽目錄) (香港中文)。喺2024年9月7號搵到。
- 香港藝術館 (無日期)。《與藝術家同接觸》 (PDF) (香港中文)。喺2024年9月7號搵到。
