安全帶 (座位)

三點式安全帶

飛機上兩點式安全帶

汽車三點式安全帶

安全帶係交通工具或機動遊戲嘅安全裝備，令到搭客固定喺座位度，避免因為突然急停或者轉彎因為慣性而造成意外。

種類

座位安全帶類型包括：

• 車廂司機同乘客用嘅安全帶
• 兒童座位安全帶
• 膊頭式安全帶（主要係過山車用）
• 全身式安全帶（機師用)

安全效果

最早期嘅汽車冇安全帶，由於當時未有車身安全結構嘅概念，啲人認為甩身跳出去比壓扁喺車箱度好，不過後嚟遇過好多意外之後發現，車禍嘅人並唔能夠跳出車箱逃生。而經常係因為身體卡喺車門，或者太近其他損壞嘅車，俾自己揸嘅車所壓過而受傷；於是改變咗安全觀念，認為固定喺車度先至係最有效嘅保護，透過伸縮結構同固定結構嘅組合，保障車裏面人嘅安全並減少衝擊。

安全帶只可以一個人使用，絕對唔可以多人共用。雖然現代嘅車輛嘅結構可以減低碰撞，若果唔帶安全帶，有機會會飛出車外，亦可能會撞到車上嘅硬物，就算有安全氣袋，基於慣性原理，突然間碰撞嘅撞擊力非常大。

正確佩戴方法

安全帶嘅橫帶應該橫過大脾，而唔係肚，用嚟固定囉柚；斜帶應該橫過膊頭中間，緊貼胸部至鎖骨位置；帶扣應該喺身側邊而唔係身上；必要時，可以調校安全帶長度；確保安全帶冇其他物件纏住或壓住，並且冇扭曲，然後先至扣緊。如果有需要，可以將安全帶適當噉盡量收緊，不過應該令到自己覺得舒適。唔好用夾夾喺安全帶度，因為會令到安全帶嘅功能大大降低。

孕婦佩戴方法

孕婦佩戴安全帶，橫帶嗰部分應該調低到兩臀骨位置，即係肚之下同大脾骨之上，將帶緊貼盤骨，盤骨係人體最堅固嘅骨骼之一。唔好將安全帶橫過肚度。斜帶嗰部分應該橫過兩胸中間同肚嘅上面，調校安全帶到舒適為止。如安全帶纏住頸部，可以將座位適當調校。

睇埋

• 安全氣袋

出面網頁

• 運輸署 - 汽車座位安全帶