跳去內容

修辭手法

出自維基百科，自由嘅百科全書
Dr. Greywolf（討論｜貢獻）喺2023年12月19號 (二) 05:26嘅修訂。
講嘢嗰陣要點樣修飾語言，先可以令講出嚟嘅嘢更加有美感呢？

修辭手法（粵拼：sau1 ci4 sau2 faat3），又叫修辭技巧，係一系列運用語言嘅結構、詞彙同語氣嘅手法，無論係講嘢定寫嘢嗰陣都有機會用到。用修辭手法，通常係想提升表達嘅效果—當中「提升效果」可以係令到一件文學作品更加有美感或者「節奏更加靚」，又或者係令一場演講生動啲呀噉。

以下啲例句，會用粵語白話文、中文書面語或者文言文做例子。

比喻

呢幅插圖描繪出晒名「肌膚好似雪咁白」嘅白雪公主。
2010 年影到嘅一朵蓮花；簡化版《愛蓮說》：「蓮花係花當中嘅君子，由淤泥生出嚟都唔受玷污。」
《嬉笑集 · 昭君彈琵琶出塞》：
「抱住琵琶就出關，擘開雙眼萬重山。」—
「哇！昭君一出塞外，就見到萬重山咁廣闊嘅空間。」
内文：比喻
睇埋：聯想意思同語義距離

比喻（明喻、暗喻、借喻）

  • 明喻：句子用喻詞「好似、猶如...」，有提個主體。
    例句：「白雪公主嘅肌膚好似雪咁白，朱唇好似玫瑰咁紅，而秀髮就好似炭咁黑。」
    例句：「離遠嘅一盞盞街燈，就好似夜空上邊嘅星星噉。」
    例句：「如花佢真係人如其名，似一朵花咁靚。」
  • 暗喻：句子用喻詞「係...」，有提個主體。
    例子：「蓮，花之君子者也。」（文言）——出自好出名嘅北宋古文《愛蓮說》
    → 粵譯：「蓮花，就係花當中嘅君子。」
    → 呢度將蓮花暗喻為「花當中嘅君子」。
  • 借喻：句子唔用喻詞，唔提個主體，直頭用喻體取代咗個主體。
    將上句用借喻改成下句嘅例子：
    A 君：「阿蓮佢又後生又靚，但係嫁畀個咁猥瑣嘅男人。」
    B 君：「一朵鮮花插咗喺牛屎上邊。」
    上句主體 → 下句喻體：阿蓮 → 鮮花
    上句主體 → 下句喻體：猥瑣嘅男人 → 牛屎

複疊

内文：複疊
睇埋：色名 § 粵語特色

複疊（疊字、疊詞、疊句、複辭、反複）

  • 疊字：將一個字重複，擺埋一齊連住用；粵語出咗名多疊字，尤其係啲有關顏色嘅字詞[1]。
    形容顏色嘅例子：「青咇咇bi1 bi1」、「紅卜卜」、「白晒晒」
    其他形容詞例子：「暖笠笠」、「漲卜卜」、「濛查查」、「安安穩穩」
    動詞嘅例子：「睇睇」、「諗諗」、「講講」、「整整」
    名詞嘅例子：「笑哈哈」、「層層疊」
  • 複辭：將同一個字詞接二連三噉用喺同一個子句。
    例子：《孟子》入邊有講到：「老吾老，以及人之老；幼吾幼，以及人之幼。」（文言）
    → 粵譯：「尊重自己（屋企）嘅老人家，從而推廣到尊重其他老人家；照顧自己（屋企）嘅細路仔，從而推廣到照顧其他細路仔。」[2]
  • 反複（連續反複、間隔反複）：有意識噉重複使用某啲詞語或者子句。
    例句：「春天嚟喇，春天嚟喇，萬物都充滿咗無盡嘅生命力。」

一覽

睇埋：敘事技巧同創意寫作

以下一覽式噉列出淨低嘅修辭手法。

  • 比擬（擬人、擬物、擬聲、形象化、人格化）
    • 擬人：將物當成人噉寫；
      例句：「死亡向我一步一步噉迫近。」
      → 死亡係一個概念，理應唔識好似人噉行路。
    • 擬聲
      例句：「廚房啲嘢跌晒落地，發出乒鈴嘭唥噉嘅聲。」
  • 排比：將三句或以上結構相似而且意思相關嘅子句或句子排列埋一齊。
    例句：「春天，你好似一朵含苞待放嘅紫荊，你好似初出湖水嘅荷芙，你好似一位娉婷嘅少女。」
  • 對偶：將兩句結構相同、字數相同、意思相關，但係多個詞性相同嘅字詞唔同嘅子句或句子，前後連住或者對稱噉排列埋一齊。
    例句：「其大本擁腫而不中繩墨，其小枝卷曲而不中規矩。」——出自《逍遙遊》
  • 層遞：順住次序排幾個，含有 有比例關係嘅嘢 嘅子句，將意思一重又一重噉展現出嚟。
    例句：「一而十，十而百，百而千，千而萬」
  • 對比（兩體對比、一體兩面對比）
    例句：「朱門酒肉臭，路有凍死骨。」（文言）——出自杜甫《自京赴奉先詠懷五百字》
    → 粵譯：「大宅嘅紅門彌漫住酒肉味，路邊就有凍死嘅人嘅骨頭。」
    → 呢度用意係突出社經地位幾咁懸殊。
  • 反問：用問句嘅方式表達，但講或者寫嘢嘅人已經知答案係乜。
    例子：《論語》入邊有講到：「學而時習之，不亦悅乎？」（文言）
    → 粵譯：「學咗嘢之後時不時反覆溫書，唔係一件好愉快嘅事咩？」[3]
    → 呢度孔子根本認定咗，學咗嘢之後時不時反覆溫書，係一件好愉快嘅事，但照樣用問句表達。
  • 設問：自問自答，藉住問題嚟引起讀者嘅注意，啓發讀者思考。
    例句：「得閒睇吓同寫吓維基百科有乜好處呢？咪就係可以學多啲知識，增廣見聞囉。」
  • 誇張：將時間、空間同數量等嘅特性誇大，達致渲染嘅效果。
    例句：「抱住琵琶就出關，擘maak3開雙眼萬重山。」——出自粵語詩集《嬉笑集》嘅《昭君彈琵琶出塞》[4]
    → 呢度話昭君一擘大眼就見到「萬重山」，唔係話佢真係見到一萬座山峰或者點咁誇張，而係話佢見到好廣闊嘅空間。
  • 雙聲
  • 疊韻
  • 映襯（正襯、反襯、旁襯）
  • 引用（明引、暗引）
    • 明引
      例句：「識得做科學嘅人都應該聽過牛頓話齋，『要求知，就要企喺巨人嘅膊頭上』，將自己嘅思考建基於前人嘅諗頭之上。」—呢段講話引用咗「企喺巨人嘅膊頭上」呢句名言，而且指明咗句嘢係邊個（牛頓）講嘅。
    • 暗引
      例句：「唔使專修經濟學都應該知，呢個世上冇免費嘅午餐。」—引用咗「呢個世上冇免費嘅午餐」呢句經濟學名言，不過句子入邊冇話句嘢係邊個講嘅。
  • 反話
  • 借代
  • 頂真：將上一句句尾嘅字或短語作為下子句嘅開頭。
    例句：「歸來見天子，天子坐明堂。」——出自《木蘭辭》
  • 通感：將本來用嚟形容一種感官嘅詞語轉移，用嚟形容另一種感官，即係例如將視覺嘅詞語，用嚟形容聽覺感知到嘅嘢。以下係聽覺通觸覺嘅一個例子：
    例句：「三粒苦松子，沿著路標一直滾到我的腳前，伸手抓起，竟是一把鳥聲。」（中文書面語）—洛夫《隨雨聲入山而不見雨》
    → 粵化：「三粒苦松子，沿住路標一路轆到嚟我隻腳前，伸手攞起，竟然係一把雀聲。」
  • 呼告
  • 示現（追述示現、預言示現、懸想示現）
  • 互文：上下文各有交錯省略，而互相補充意思。
    例句：「將軍百戰死，壯士十年歸。」——出自《木蘭辭》
  • 錯綜
  • 婉曲：唔直接噉用啲準確嘅詞句表達原意，而係用啲相關嘅詞句，間接噉烘托、流露或者暗示原意嘅一種表達手法。婉曲通常係用啲冇攻擊性嘅字詞，嚟代替有冒犯性或者會令人反感嘅字詞。
    「炸死了你，我的故事就該完了。炸死了我，你的故事還長著呢。」（中文書面語）—張愛玲《傾城之戀》
    → 粵化：「炸死咗你，我嘅故事就應該完喇。炸死咗我，你嘅故事仲有好長呀。」
  • 摹色
  • 回文

文獻

  • 張燕潔. (2013). 潮汕方言俗語的修辭藝術. 江西教育學院學報, 34(5), 102-104 （大陸簡體）

外拎

語言相關

拉雜相關

引用來源

  1. ↑ Colours in Cantonese (PDF). Cantonese For Families.
  2. ↑ 老吾老，以及人之老；幼吾幼，以及人之幼 (PDF) 中華經典名句 (中學)
  3. ↑ 錢穆. (2002). 論語新解. 生活, 讀書, 新知三聯書店.
  4. ↑ 《嬉笑集》校正電子版
  5. ↑ Mejdell, G. (2011). Diglossia, code switching; style variation; and congruence: Notions for analyzing mixed Arabic. al-'Arabiyya, 29-39.
由「https://zh-yue.wikipedia.org/w/index.php?title=修辭手法&oldid=2065299」收