后海灣

流浮山影出去后海灣

后海灣（Hau Hoi Wan），原寫後海灣、後海，係香港同深圳西面一大灣，因為近深圳，又叫做深圳灣（Shenzhen Bay或者Shum Chun Bay），而英國人叫佢做Deep Bay，所以又叫做深灣。后海灣原本寫做後海灣，因為佢係南頭後海，所以叫後海灣，而南頭嘅前海，亦都有前海灣，又叫大剷灣，向住伶仃洋。

名

因爲后海灣有后字之故，啲人直覺同天后有關，而后海灣口西面，蛇口側邊嘅赤灣有赤灣天后廟，更加深有呢個聯想。之不過按地理計，后查實係後字減筆。有時舊地圖都有註後海灣。而查實呢，後海係同前海相對。後海喺南頭東岸，而前海喺南頭西岸。

地理

由后海灣東嘅流浮山，觀賞日落景色。遠處為深圳灣公路大橋。

后海灣三面畀地圍住，東係南頭半島，北係深圳，西係香港新界米埔、流浮山等地，西南方向通出伶仃洋，門口係深圳蛇口同香港嘅爛角嘴。后海灣，雖然三面有地環抱，可以泊船，但因有沙泥淤積，唔啱泊大船。而周圍地勢平坦，難以避風。

后海灣因為周圍有河注入，所以有唔少淺灘，變成紅樹林。流浮山亦產蠔。不過深圳方面大量填海，所以淺灘亦少咗好多。

史

一八九八年嘅《展拓香港界址專條》中嘅深圳灣同Deep Bay，就係后海灣

英國向大清租借新界時，亦將成個后海灣租埋，而岸界係以水漲計，所以當時香港西界係當時新安縣岸邊。西界再響南頭半島南端，赤灣附近接條直綫落大嶼山大澳，做香港西海界。不過一九九七年七月一號之後，后海灣正式由香港同深圳各佔一份。

響中華人民共和國成立之後，因為有大量難民來香港，所以香港同中國大陸之間，來往受管制。而當時大陸生活環境唔係咁好，有連場政治運動，唔少人都坐船由后海灣偷渡來香港，響流浮山等地上岸。一九六七年香港左派暴動，有香港人響后海灣畀人擄返大陸。

交通

后海灣有深圳灣公路大橋由香港鰲磡石通去南頭半島東角頭。