國家安全

1986年4月，美國總統列根聼關於利比亞爆炸事件嘅 briefing

西敏宮外圍有保安戒備，用石屎去擋住有可能放咗汽車炸彈嘅車

國家安全係一個國去保護自己嘅保安同軍事嘅需要，可以包括佢嘅公民、經濟、制度、同自然環境等等，一般都被認為係屬於個政府嘅職責。喺舊時，國家安全嘅概念一般都係個國家去抵擋外敵入侵嘅能力。不過到依家，就唔單只淨係包含軍事方面，亦都會包括其他各種方面，由保護能源嘅供應到維護網絡安全都可以算入佢數。

政府一般可以靠唔同嘅方法去維持國家安全，可以係政治手法、經濟能力、或者外交途徑，甚至有需要嘅時候，用軍事武力嚟達到目標。喺今時今日嘅全球化社會，好多威脅唔同國家嘅問題已經超越一條邊界咁簡單，包括恐怖主義、核武研發、同全球暖化等等。呢啲就需要唔同嘅國際組織或者非牟利組織去合作處理。

涵蓋嘅範圍

對於一個國家嚟講，對於國家安全嘅威脅可以有好多唔同嘅層面，可以包含到經濟、能源、邊界、自然環境、食物、同網絡等等。所以，侵犯國家安全嘅，亦都可以有唔同種類，例如其他國家、恐怖同犯罪組織、甚至天災都有可能。

一般嚟講，政府會有一個部門專係處理同國家安全有關嘅政策問題，其中包括西班牙、瑞典、英國、同美國。喺某啲國家，處理國家安全嘅行政部門更加會係屬於內閣嘅一部分，反映到佢嘅重要性。雖然唔同國家嘅方法未必一樣，不過通常都係以軍事武力為主。以前嘅軍事主要都係陸軍、海軍、或者海軍陸戰隊，到依家就加埋空軍，同時亦會用到網絡安全同心理學嘅知識嚟做攻防。當然，嗰啲方法隨咗用咗維護國家安全之外，一樣可以用嚟侵略其他地方，所以仍然有一定嘅風險。

軍事

喺國家安全，最普遍嘅意思就係鞏固國家嘅軍事，嚟抵擋其他地方嘅軍事入侵或者搞恐怖襲擊。簡單講，國家安全喺軍事方面，就係一個國家維護自己邊界嘅能力。有啲國家，例如南非同瑞典，就淨係用佢哋嘅軍隊嚟自衛；不過其他國家，例如法國、俄羅斯、英國、同美國，就亦會用軍隊嚟計劃喺海外嘅行動。

基建

内文：關鍵基礎設施

芬蘭嘅情報部門總部

除咗軍事以外，好多國家嘅基建，都係對國家運作好重要，叫做關鍵基礎設施。呢啲會包括機場、火車站、重要嘅高速公路、醫院、發電站、水壩、煉油廠、同電腦網絡嘅樞紐等等。維護國家嘅呢啲基建，就能夠避免外敵經過用破壞或者污染嘅手法，嚟影響到國家嘅日常運作。仲有，唔同嘅天災亦都好有可能影響到嗰啲設施，令有效嘅應對政策更加重要。

網絡

内文：網絡安全

自從互聯網出現，網絡安全成為咗保護國家安全嘅新範圍。隨住手機同電腦越嚟越普及化，社會亦都逐漸依賴電腦技術。所以，呢啲電子產品就正正成為咗好多外敵嘅新對象，包括有專係負責威脅網絡安全而過世嘅黑客。唔同國家嘅政府已經開始睇佢做國家安全嘅重要範圍，而攻防自己嘅網絡亦都可以叫做網絡戰。例如，美國同以色列曾經用 Stuxnet 嘅系統嚟打沉伊朗核計劃。

政治

有啲政治學家，例如 Barry Buzan、Ole Wæver、同 Jaap de Wilde 等等，都認為政治穩定對國家安全有好大嘅影響。其他就覺得唔單只係穩定，仲要係喺國際社會上嘅政治權力平均分配，先至會穩定。所以，國家嘅政治穩定就建基喺國際法、國際組織、同埋國家之間嘅外交談判等等。政治穩定亦都取決於國内人民嘅政治權利係受到保障，唔會好有動機去反對個政府。

環境

環境安全主要係保護國家嘅生態系統，避免出現同環境有關嘅問題，例如濫伐同水土流失，令笪地方更加難畀人類居住。呢啲因素會影響到個國家嘅農業，所以就會干擾到國家嘅經濟同民生，成為國家安全嘅議題之一。

環境威脅對於國家安全嘅影響，絕對有好多可能性，亦有唔少嘅爭議，其中最主要嘅影響可以分成幾個唔同嘅種類：

• 國際環境問題：呢寫包括影響到全世界嘅環保問題，例如全球暖化、濫伐、生物多樣性跌等等
• 地區環境問題： 呢啲係某一啲地區特別受影響嘅環境問題，例如旱災、農業問題、或者水土流失。
  • 呢啲問題好多時都會產生其他社交問題，例如打仗、遷徙產生嘅移民問題、甚至資源鬥爭期間發動嘅屠殺等等。
  • 其中，敘利亞嘅環境問題有可能觸發敘利亞內戰，而農業問題亦都盧旺達大屠殺可能有關係
• 打仗產生嘅環境問題：呢種同頭先嗰個調返轉，係打仗遺留落嚟嘅環境問題。歷史案例包括：
  • 羅馬帝國毀滅咗迦太基（今日突尼斯附近）嘅生態系統
  • 伊拉克總統侯賽因喺海灣戰爭期間燒爛咗好多油井
  • 喺打仗期間，英國喺馬嚟西亞同埋美國喺越南用嘅橙劑，人造咁令啲樹木落葉

氣候變化影響緊全球嘅農業同食物安全

2015年，嚟自伊拉克同敘利亞嘅難民坐住艇去西班牙海岸避難

能源同自然資源

内文：能源安全

自然資源包括土地、礦物、同能源嘅嚟源等等，而又足夠嘅自然資源對一個國家嘅工業化同經濟發展有好大影響。例如，喺1991年嘅海灣戰爭，伊拉克為咗要科威特嘅油井而入侵，而美國亦同樣因為唔想伊拉克攞到而參戰。喺中東、印度、同巴基斯坦，水源嘅問題令國家之間有唔少嘅矛盾。

因為管理好自然資源對國家和諧嘅重要性，所以好多國家嘅國家安全政策，都有提到需要保護自然資源，其中聯合國嘅《可持續發展目標》亦有提到要揾可持續嘅方法去產生能源（即係可再生能源）。喺美國，軍事基地已經有太陽能板準備好，咁喺停電嘅時候就可以攞嚟用。

文獻

• Romm, Joseph J. (1993). Defining national security: the nonmilitary aspects. Pew Project on America's Task in a Changed World (Pew Project Series). Council on Foreign Relations. ISBN 978-0-87609-135-7. 喺2010-09-22搵到.{{cite book}}: CS1 maint: ref duplicates default (link)