牧野之戰，又叫武王伐紂，係周國滅商國嘅仗，唔肯定年代，估計喺公元前1130年到前1018年間。之所以叫牧野之戰，皆因喺牧野決戰。牧野喺商國京城朝歌南面，喺當今中華人民共和國河南淇縣，喺衞河北面，河南新鄉市左近。
大戰之前，商軍征伐緊西南夷，朝歌西面防守減弱，畀周國有機可乘。嗰時周王姬發領軍，帶住各方國嘅兵，向東征伐商國，商王子辛迎戰，商國唔夠打，輸清光，子辛自殺死咗。周軍殺咗好多人，血流成河。之不過呢場仗並未將商滅嗮，商仍然保住東面各方國，直到姬發死後，姬奭同姬旦征東，先至消滅嗮反抗勢力。因爲姬發死後叫武王，而子辛又叫紂，所以又叫武王伐紂。
中國斷代史入面，將子辛死睇做商代完咗，周代開始。若然用兩國史嚟睇，兩國實際一齊存在咗好多年。
