Michel Strogoff (suterot)
|
Michel Strogoff tir izvastuvaf berpot ke Jules Verne sanegayan bak 1876, tis tana karba ke Yona zultafa koyara nevatum. Moskva-Irkutsk levvergumvelt va grabom koe Yona zultafa koyara kotoraf abdumimaks kosutecker : glupuca ke sibiraf divatceeem va budara va stuva tadler, lidam Afrika ( koe Va aluboya safta bene vipka ) ok ketaxo ke welfa is naeleem ( koe Stuva ke Hatteras redakik ok Vuntoye decitmetre koe mid ). Bata posara tir popofa kire meviduson va antaf rodefaskin poeem ke ilkik zo skur. VildeksTaneaf pakLana Tatar olgalicura va gabera ba Sibira sol arak ke Rossia arpumar. Volnik gan lane zatkafe rossiafe fayikye zo dirgar : i gan Ivan Ogareff. Bat jastrik guzekar da gu Irkutsk va int filpon koralmar numaze va widava is dacaf bowesik tis berikye ke gindik di bilder. Michel Strogoff tis ayikye grupenon budafe sorion zo stakser enide va bat azed di edober. Wetce voik ke Sibira, va kote wupe ke vuida gruper. Toloy felusik, Alcide Jolivet francik is Harry Blount englik va mila vawa nukoolapid, voxis bulafa yikya. Impadimak van Novgorod va sin ilburer, koo mayesina patecta lize ucul koe kota disukera nutir. Yolt ke yikya tir Nadia Fedor. Va divbliyine gadikye djukazokever. Strogoff jupar da ina wetce berikya bevular aze va koyara doon dakir, koo meftava is yona kelda. Sin va foydacek is govitol koe Ural rodega liked aze va Ekaterinburg artlakid. Kan pilkoma ke Nikolay Korpanov dolekik, staksenik ke gindik va anamsura ke toidesik ke Ogareff divvawar. Voxen ba remlapira va Irtic kuksa, Tatar gejik va kuja dilfud numen koyasik zo gralomed. Iskeyen wetce awalkik, Michel Strogoff gan lan tawadayik ke Omsk zo levemuder ise zo roper. Omsk tir inafa vofa widava numen goxe Marfa guazafa gadikya va in kagruper nume pu obrara ke detik ke Ogareff volins sugdar. Acum inafa vuida loloon keunisir. In gan volnik tere zo gralomer, keni toloy ciaf felusik. Toleaf pakNeken Tatar sayakik va in vanmiau stoleni tari me pilkomodad. Jolivet is Blount zo tunuyad. Strogoff va mila kamba ke gadya is Nadia luxeon zo belcekar. Bata toloya ayikya ulijdana gan Sangarre tise detajikya ke Ogareff va in nujimekagruped. Zatkik bam gorar da Marfa Strogova gu knut rejdera fu zo levplekur enide gradilik va int di ranker. Gu anteyara va iteem kan imiz ke abalt batakon tuidulayan zo lanzar. Ogareff va twa ke gindik burena gan Strogoff koilkar nume gorar da va inafa runda di narir. Itiskaf Strogoff re tir mewupesis nume zo jovlecker. Voxen Nadia va int divstoler aze va in van Irkutsk nyaper. Nikolay Pigasov yikye ta remlapira va Yenisey bost az artlakira va Nijni-Udinsk va sin pomar. Kaxe sin gan tatarik gire zo gralomed. Bexe Strogoff is Nadia va sinafa enintera lajucoed. Voxaze va kimtaf Pigasov virnon rejdeyen koe rijust katrasid. Sin do yon rossiik va int koankitad, lasukallapitison va Irkutsk vamoo Baikal uzda az Angara kuksa. Toloy felusik va sinafa vawa gire gamdad. Aelepes idatcol zo gonilplatid aze va deblamera va widava takrelon rojuna gan dacik gostegevad. Gaderopaf divblinik dirgan gan Vasili Fedor gadikye ke Nadia va lyumara dace paked. Voxen Ivan Ogareff jupayar da bevulayar Michel Strogoff nume koe widava ixam tigir. Va tolna moe welma ke Angara kuksa koteyar, firdeteson va pak ke widava is skalteteson va rojusik. Akoyepeson, Nadia is ageltucaf Michel Strogoff zdarion artlanid nume basxatcaxad. Jastrik va lan itiskik lagadjuber voxe eafton sonker da wiiskuca tiyir stetara : ikuza ke Strogoff mo adzi kev keska ke idul al nendar viele baponaf imiz va iteem sye co anteyayar. To Strogoff va Ogareff aytar. Nadia va gadye dimrokatane gan dacik nope malplatira va tatarik olgalicusik katrasir. Michel Strogoff is Nadia kured, kumzilinon gan Fedor is gadikya ke gradilik. Koredik
Drunara va berpotKoe tame ke Jules Verne, gindafa Rossia nuvelar volsaca ke Engla ok Tanarasokeem tis patecta ke xultusa wituca. Ale to lana tamava dem rusagafa prostewa, adalafa gu bumpuca is duxara. Rossiafa soka va Tatar yatkuca tsuner neke sedme ludeem ke ayevaf seltay dere tir romoaklepen. Kalstegesi mivroti ke gindik remi grabom zo rankeper. Tulon, ardial mepuvotenon zo divrozar : « Do rossiaf ardial ceyapaf, kota ovasa flidera vol tir favlafa. Inaf detik va sayakafa ekava dikid nume sayakon gisopud. » Rezgalera va kevusik va vertuma ko Sibira nuvelar exaksunapafa tcala ke evayuca. Isen wavidura gigorasa, dum tula ke Vasili Fedor sintaaf kurmik kioveson tis klokusik :« Moida inafa yotera va divef birgaf seltom zo exoneyer, pune va mallapira ko Irkutsk mbi kobenplekuyur numazen batultik vanbures va karzaks va in kaik jowa vere stayad. » Mantukafa swava ke nafalik va olguca ke durulaf kizeyeem nemon lajuralidur. Taneake ke ckaneeem is golebeem is lideem is swavay va lan lumiskaf is meayaf seltay tiaver. Michel Strogoff va kontega kaike fereon kota pestaka rodefelir. Tulon lente gadikya rodezavzar merorelatcen larde inafa vuida rupter. Ison, beka in enwe me tir wiiskaf, pune tokinde va inafa brunuca tove mejera ke Nadia dun nyapesa nekev kuncarsa rodizvet ? Kotcoba va tumalyara va faven is pimtas ravlem ke pwadesik paker : « Kota inafa bewa, fartunanyafa, tiyir matek poopon iksantuyun ta lokiewafa sopura va godjaca. » Xabe kore foalk va bata tamava graced larde ayik va um rob isu vegera ta ikaplekura rodanedir. « In tiyir skusik va benplekura. Acum va tana lorojuikena duga koe Rossia diyir, sedme dizvera ke sposaf Turgenyev berpotik, i va duga stasa kal vamoefa tirka koe moskvafo gindaxo. » Va milasavsaca bene slavafa swava is drowigafa balima batlize katrasit. Tana yunkera tir tegi ke tawadayik giwas Strogoff nek mebidgeson katcalas : « Va kona gablera ! Ant oviskik moe tawava ronozinular. » Bata rilitafa swavopa ke Nikolay Pigasov zo gruyer, i ke nuedaf sumesutesik mebelison wan deas va mezolonafa kutcupsa nekev vinustara ke meld : « To jinafi goni vulkutur numen vere gonafaná. » Berpot tir ile gulaf gradilik dum Hatteras ok Nemo ok Robur : mingara ke Strogoff tir teca kuranafa levetiruca. Va mukot tceder, loviele doimpanon gan po ke ra is fira, gan tulon salt ke bost ok divnira ke sanelia. Kotviele zo stoler, pune me lagotcer larde zo star liz djulanir. Larde sye tir wiiskaf, pune iskuson zo nyaper, roeson va buresi bali. Berpot jupar da corara va yalestafe tame nyebayane koe dure dazusa izva divefa gu kot witaf stravok xultur : « Bata olgalicura, mefavlafa dum kota dilfusa va rossiaf ctakik, tiyir awalkedapafa tove tatarik. » Dace viele tuwarzara galter, neke nutir mekalvekafa is rotugalafa is ezefa gu mana xuta, ise barlipon is forgon nuyordar. Tulon sumesutesiki nutir, kevkalipison va wavdaca ke ugafa exulera ke tisik is coba koe rossiafa gulafa darka. Bata litera gan beonafa ralentara zo laumasir, i gan ralentara gu tamava ke rabaf sanerotieem bron kaatoena gan Blount felusik isu Jolivet. Ban toloy volnaf berik va divepatectafa is sumefa adala ke metuekemana ageltinda nekev folvafa gorestuca ke bifeem ke gradilik drigdad kotlizo remlakid. Wori mana nega tir lecon suyapafa, vegeduyuna ton kotavesa vestara va dreeem ke gaduca. Tulon sugdala ke bata yatera div keunisisa disukera ke gadikya, is ke kaaneyara va gadikye, is ke rolafa beruca tuadrayana pu Nadia abdi kurenuca. Ison kas me tir Oidipous undera ruyena koe buskura ke wiiskuca ? Neken kaike ilkafa axofera, gaderopafa adraca ale tir. Voxen rantafa tanuca ke gindaxo konakilana mali taneafu bu vox kevkalina gan altokafa is lidafa cunkuca nutisa meromoticana ; kan gluyaxa ke fortey zo godimsular. Tuke Michel Strogoff, gindik is dacaf berik gire zo kagluyad. Gluparsafa patecta koe intaf pakeem gan olkik katanan den mil yasaf gort re zo kereler : i gan guazafa Marfa Strogova koe Omsk, is Vasili Fedor koe Sankt Peterburg, solve Michel is Nadia mal battan kal bantan rofid. Tuwava wal toloy vrebaf nael kaatoen gan tanoye gadikye isu gadikya zo malvegedur ise va mweduca ke koaykan kizeyeem loon doster. YunkexaKonaka yunkexa va berpotam, koe xantofa piskura, 1876 Dere rupel
Vuestexa
|
 Moek ke xantof piskuks ke 1876 | ||||||||||||||||
.svg){kind=icon}
