Андрэй Сапега (сын Паўла)

Андрэй Сапега

А. Сапега. З Коданскай галерэі, 1709
Герб «Ліс»
Асабістыя зьвесткі
Нарадзіўся	каля 1560
Памёр	да 11 кастрычніка 1621
Род	Сапегі
Бацькі	Павал Сапега Аляксандра з Хадкевічаў
Жонка	Марыя з Чартарыйскіх Крыстына з Дэмбінскіх
Дзеці	Станіслаў Тамаш, Ганна, Аляксандра, Крыстына, Ядвіга, Мар’яна, Дарота

Андрэй Сапега (каля 1560 — да 11 кастрычніка 1621) — дзяржаўны і вайсковы дзяяч Вялікага Княства Літоўскага. Падчашы вялікі літоўскі (1588—1592), кашталян менскі (1592—1597), ваявода полацкі (1597—1613) і смаленскі (з 1621).

Валодаў Вішніцамі, Сапежышкамі, маёнткамі на Падляшшы.

Біяграфія

А. Сапега. В. Герсан, 1860

З коданскай лініі магнацкага роду Сапегаў гербу «Ліс», сын Паўла і Аляксандры з Хадкевічаў. Меў братоў Мікалая і Багдана.

У 1590-я навучаўся ў Падуанскім унівэрсытэце. Ротмістрам удзельнічаў у Інфлянцкай вайне (1558—1582), 21 кастрычніка 1578 разграміў маскоўскія аддзелы, што ўзялі ў аблогу Вэндэн, захапіў у палон ваяводаў П. Тацева і В. Варанцова.

Займаў шэраг дзяржаўных пасадаў, у тым ліку ваяводы полацкага, ад якой адмовіўся праз канфлікт з палачанамі.

Неаднаразова выяжджаў за мяжу, галоўным чынам у Італію: у 1579, 1592 і 1608.

Упершыню ажаніўся з Марыяй Чартарыйскай (шлюб у 1569), другі раз пабраўся шлюбам з Крыстынай Дэмбінскай (у 1570), зь якой меў сына Станіслава Тамаша, а таксама дачко Ганну, Аляксандру, Крыстыну, Ядвігу, Мар’яну і Дароту.

Літаратура

• Вялікае княства Літоўскае: Энцыклапедыя. У 3 т. / рэд. Г. П. Пашкоў і інш. — Мн.: Беларуская Энцыклапедыя, 2005. — Т. 2: Кадэцкі корпус — Яцкевіч. — 788 с. — ISBN 985-11-0378-0
• Энцыклапедыя гісторыі Беларусі. У 6 т. / Беларус. Энцыкл.; Рэдкал.: Г. П. Пашкоў (гал. рэд.) і інш.; Маст. Э. Э. Жакевіч. — Мн.: БелЭн, 2001. — Т. 6. Кн. 1: Пузыны — Усая. — 591 с. — ISBN 985-11-0214-8

Вонкавыя спасылкі

Андрэй Сапега (сын Паўла) — сховішча мультымэдыйных матэрыялаў