Cynthia Lennon
 (1964)  | |
| Namo dalam bahaso usali | (en) Cynthia Lillian Powell |
|---|---|
| Biografi | |
| Lahia | (en) Cynthia Lillian Powell 10 September 1939 Blackpool |
| Kamatian | 1r April 2015 (75 tahun (id) terjemahkan) Mallorca |
| Panyabab kamatian | Kanker paru-paru jo kanker |
| Almamater | Liverpool College of Art |
| Kagiatan | |
| Karajo | Urang seni visual jo panulis opini |
| Kaluarga | |
| Pasangan hiduik | John Lennon (1962–1968) Roberto Bassanini (1970–1976) John Twist (en)  (1978–1982) |
| Anak | Julian Lennon |
 | |
.jpg)
Cynthia Powell Lennon (lahia di Blackpool, Inggirih, 10 September 1939 – maningga di Majorca, Spanyol, 1 April 2015 pado umua 75 taun) adolah istri partamo anggota The Beatles John Lennon. Basamo Lennon, inyo punyo surang anak nan banamo Julian Lennon.
Kaidupan awal
[suntiang | suntiang sumber]Cynthia Powell lahia di Blackpool, Inggirih pado 10 September 1939. Ayahnyo banamo Charles Powell, surang pagawai di General Electric; ibunyo banamo Lilian.[1] Ayah jo ibunyo barasa dari Liverpool, tapi pindah ka Blackpool salapeh dimulainyo Parang Dunia Kaduo. Cynthia basakolah di Liverpool Junior Art School; pado umua 11, inyo panah mamanangi kompetisi seni nan disalanggaroan dek surek kaba Liverpool Echo.[2]
Pado bulan September 1957, Powell masuak ka Liverpool College of Art untuk kuliah desain grafis.[3] Di kelas lettering, inyo basuo jo John Lennon, nan acok maminjam pena jo pensil ka Powell. Inyo jo Lennon mulai dakek di sinan; juluakan John untuaknyo adolah "Miss Hoylake" atau "Miss Powell".[3] Pasangan ko mulai bapacaran salapeh sabuah pesta akhir semester. Powell pado kutiko itu alah batunangan, namun mangakhiakan tunangannyo demi Lennon, nan juo mamutuihan hubuangannyo jo pasangannyo kutiko itu Thelma Pickles.[4] Hubuangan Lennon jo Powell pado awalnyo panuah dek cemburu jo kekerasan; pado suatu kali, Lennon manampanyo inggo kapalonyo kanai pado tembok dek cemburu mancaliak Powell badansa jo Stuart Sutcliffe, bassist The Beatles.[5]
Kutiko The Beatles partamo kali bamain di Hamburg pado 1960, Lennon rajin manulih surek pado Powell nan tingga di Liverpool. Satahun kamudian, Powell jo Dot Rhone (pasangan Paul McCartney pado kutiko itu) mangunjuangi band ka Hamburg pado liburan Paskah.[6] Powell tetap kuliah di Liverpool samantaro Lennon manaruihan karir musiknyo.
Pakawinan jo John Lennon (1962-68)
[suntiang | suntiang sumber]Powell gagal lulus pado ujian guru seninyo pado 1962, namun inyo manamuan baso inyo hamil anak John pado bulan Agustus 1962. Kutiko Powell maagiah tahu Lennon, inyo maajaknyo untuak manikah.[7] Kaduonyo manikah di Liverpool pado 23 Agustus 1962, dihadiri dek Paul McCartney jo George Harrison sarato manajer Beatles Brian Epstein.[8] Lennon baumua 21 tahun, sadang Powell baumua 22. Kaduonyo indak pai untuak babulan madu, dek sebab Lennon ado jadwal konser di Chester pado malam nan samo, walaupun kudian pasangan ko pai balibur ka Paris pado bulan September.[9]
Salamo Powell hamil, Epstein maizinan inyo jo Lennon untuak tingga di apartemen pribadinyo di 36 Falkner Street, Liverpool.[10] Julian Lennon lahia pado pukua 7.45 pagi pado 8 April 1963 di Sefton Hospital, Liverpool. Lennon indak dapek mancaliak kalahiran anaknyo sampai tigo hari kudian, dek sebab inyo pado wukatu itu sadang konser.[11]
Pado wukatu Julian lahia, The Beatles alah manjadi terkenal di saluruah Inggirih, tapi Epstein maminta pado Lennon jo Powell untuak marasioan kalahiran Julian untuak indak mambuek kecewa para penggemar Beatles nan kabanyakan anak gadih mudo.[12] Media massa baru mandanga kaba buruang tantang Powell jo Julian pado akhia tahun 1963 dan mangarubuangi rumah ibu Powell di Hoylake.[13] Lennon jo Powell pindah ka sabuah apartemen tigo kamar di 13 Emperor's Gate, Cromwell Road. Penggemar Beatles manamuan rumah tu dan bakemah di muko rumah; Powell acok tapaso untuak mausia urang-urang tu untuak masuak atau kalua dari rumahnyo surang.[14][15]
Powell ikuik dalam tur Beatles ka Amerika Sarikat. Lennon maizinan inyo jo Powell difoto dek pers, nan mambuek berang Epstein nan bausao kareh untuak manjado panikahan kaduonyo raasio.[16] Di rumahnyo di London, penggemar Beatles mulai manjadi lia, manempelan permen karet di gagang pintu dan manguyak-nguyak pakaian Powell atau Lennon kutiko salah surang dari kaduonyo tibo atau kalua dari rumah.[17] Penggemar Beatles bahkan tahu tantang rencana liburan keluarga Lennon di St. Moritz atau di sabuah kastil di Irlandia; mambuek Powell jo Pattie Boyd, istri George Harrison, tapaso kalua dari tampek liburan bapakaian palayan.[18]
Pado bulan Juli 1964, Lennon jo Powell pindah ka sabuah rumah gadang banamo Kenwood di Weybridge, dakek rumah Cliff Richard.[19] Powell bakawan jo Pattie Boyd dan Maureen Starkey (istri Ringo Star) dek rumah katigonyo badakekan.[20] Rumah Kenwoodnyo manjadi tampek bakumpua anggota jo pasangan Beatle lain, urang-urang pamusik (kabanyakan dari Amerika), bahkan rang-urang asiang nan ditamui Lennon di klub-klub malam London.[20]
Pado maso iko, anggota The Beatles mulai managiah LSD; John, Cynthia, Harrison, jo Boyd mancubonyo untuak kali partamo pado bulan Maret 1965 di rumah surang dokter gigi banamo John Riley, nan indak maagiah tau baso ubek nan inyo agiah adolah LSD.[21] Lennon mulai mamakai LSD sacaro rutin di sampiang ganja; Cynthia kudian ikuik lo mamakai walaupun mandapek efek psikologis nan agak parah.[22] Masuak tahun 1967, sikap agresif Lennon dari maso keteknyo mulai malayua dek narkotika, namun inyo mulai indak responsif dalam komunikasi jo urang lain, tamasuak Cynthia.[23]
Sabalun jadwal pajalanan ka India pado awal tahun 1968, Cynthia manamuan surek-surek dari Yoko Ono untuak suaminyo. Lennon mambantah baso inyo ado ubuangan kusuih jo Ono, walaupun inyo acok manalepon dan bakunjuang ka Kenwood.[24] Dalam pasawat pulang ka Inggirih, Lennon mabuak barek dan mangaku baso inyo baubuangan jo banyak wanita salamo pakawinannyo jo Cynthia, tamasuak jo Joan Baez dan Eleanor Bron.[25] Lennon manyaranan Cynthia untuak balibur ka Yunani basamo kawan-kawannyo samantaro inyo tingga di Kenwood untuak rekaman album The White Album.[26] Cynthia pulang labiah capek dari Yunani pado 22 Mei 1968 dan manamuan Lennon jo Ono baduo di kamar.[27] Pado 22 Agustus 1968, Cynthia manggugat carai Lennon, nan disahkan pado tanggal 8 November 1968. Inyo mandapek hak perwalian atas Julian dan pitih 100,000 poundsterling (sekitar 1,747 juta poundsterling pado 2020).[28]
Kaidupan salapehnyo
[suntiang | suntiang sumber]Salapeh bacarai jo Lennon, Cynthia mambukak sabuah restoran di Ruthin, Wales, nan banamo Oliver's Bistro.[29] Inyo manulis sabuah memoir tantang pakawinannyo jo Lennon, A Twist of Lennon, nan tabik pado tahun 1978. Lennon bausao untuak mangantian penerbitan buku itu salapeh bocorannyo tabik di surek kaba.[30]
Cynthia maningga pado tanggal 1 April 2015 di rumahnyo di Majorca, Spanyol dek sakik kanker.[31]
Rujuakan
[suntiang | suntiang sumber]- ↑ Lennon 2005, hlm. 16–17.
- ↑ Harry 2000, hlm. 266.
- ↑ a b Edmondson 2010, hlm. 27.
- ↑ Cross 2004, hlm. 9.
- ↑ "Lennon's friends recall ex-Beatle". BBC News. 25 November 2005. Diakses tanggal 27 March 2011.
- ↑ Cross 2004, hlm. 33.
- ↑ Edmondson 2010, hlm. 47.
- ↑ Spitz 2005, hlm. 348.
- ↑ Cross 2004, hlm. 67.
- ↑ Brown 2002, hlm. 93.
- ↑ Edmondson 2010, hlm. 51.
- ↑ Davies 1968, hlm. 173–174.
- ↑ Lennon 2005, hlm. 271.
- ↑ Lennon 2005, hlm. 172–173.
- ↑ Spitz 2005, hlm. 436.
- ↑ Spitz 2005, hlm. 460–462.
- ↑ Spitz 2005, hlm. 514.
- ↑ Davies 1968, hlm. 214,228–229.
- ↑ Davies 1968, hlm. 323–326.
- ↑ a b Lennon 2005, hlm. 204–206.
- ↑ Herbert, Ian (9 September 2006). "Revealed: Dentist who introduced Beatles to LSD". The Independent. Diakses tanggal 19 October 2009.
- ↑ Spitz 2005, hlm. 665–666.
- ↑ Davies 1968, hlm. 328–329,334–335,384.
- ↑ Spitz 2005, hlm. 740–741.
- ↑ Edmondson 2010, hlm. 101.
- ↑ Lennon 2005, hlm. 281–282.
- ↑ Spitz 2005, hlm. 772.
- ↑ Edmondson 2010, hlm. 113.
- ↑ "Cynthia Lennon". BBC. Diakses tanggal 4 Mai 2020.
- ↑ "Life with The Beatles". BBC News. 27 August 1999. Diakses tanggal 4 May 2007.
- ↑ "John Lennon's first wife Cynthia dies from cancer". BBC News. 1 April 2015. Diakses tanggal 2 April 2015.
Bibliografi
[suntiang | suntiang sumber]- Lennon, Cynthia (2005). John. Hodder & Stoughton. ISBN 978-0-340-89512-2.
- Harry, Bill (2000). The John Lennon Encyclopedia. Virgin Books. ISBN 978-0-7535-0404-8.
- Edmondson, Jacqueline (2010). John Lennon: A Biography. ABC-CLIO. ISBN 978-0-313-37938-3.
- Cross, Craig (2004). Day-By-Day Song-By-Song Record-By-Record. iUniverse. ISBN 978-0-595-31487-4.
- Spitz, Bob (2005). The Beatles – The Biography. Little, Brown and Company. ISBN 978-0-316-80352-6. https://archive.org/details/beatlesbiography00spit.
- Brown, Peter; Gaines, Steven (2002). The Love You Make: An Insider's Story of the Beatles (edisi ke-Reprint). NAL Trade. ISBN 978-0-451-20735-7.
- Davies, Hunter (1968). The Beatles: The Authorized Biography (paperback). Dell Publishing. Also adapted for publication in Davies, Hunter (13–20 September 1968). "The Beatles". Life.
