Birthe Wilke

Birthe Wilke (* 19. März 1936 in Däänmark) is en däänsche Singersche.

Wilke is in Kopenhagen groot worrn un hett al as lütte Deern en Talentweetstriet wunnen. Mit 20 Johren hett se ehr eerste Schallplaat opnahmen mit en Coverfaten vun Doris Day ehr Leed Que Sera, Sera. Bi den Dansk Melodi Grand Prix is se utwählt worrn, tosamen mit Gustav Winckler en Leed bi den Eurovision Song Contest vun’t Johr 1957 to singen. Mit jemehr Leed Skibet skal sejle i nat („Dat Schipp stick vunnacht in See“) hebbt se den drüdden Platz beleggt. Den Bidrag hebbt de beiden mit en langen Söten toenn bröcht, wat to de Tiet en rechten Schandaal utlööst hett.

As Solokünstlersche hett se ehr Land 1959 noch eenmol vertreden. Dor süng se dat bliede Leed Uh, jeg ville ønske jeg var dig (dt.: Uh, ik wull, ik weer du) un keem dormit bit op den föfften Platz. Se harr in disse Tiet vele Optreden in Düütschland, Polen un in de USA. In’t Johr 1961 hett se in den däänschen Film Reptilicus en Nachtclub-Singersche speelt. Mitt vun de 1960er Johren hett se sik in’t Privatleven torüchtogen. 1973 keem se aver noch mol mit en kort Comeback wedder torüch.

Literatur

Laursen, Carsten Michael, Top-Pop: Navne i dansk pop 1950-2000, L&R Fakta 1999, ISBN 87-614-0086-6