劉江華

  提示：呢篇文講嘅唔係劉江、江華或劉德華。

劉江華
出生日	1957年6月22號  （67歲）
出生地	香港
國籍	香港
母校	聖保羅書院、雅息特大學、柏立基教育學院、香港城市大學
職業	政治人、太平紳士
政黨	民主建港協進聯盟
[改維基數據]

 劉江華（粵拼：lau4 gong1 waa4） ，JP（英文：Ray LAU Kong-wah；1957年6月22號—），花名「哨牙仔」，係香港政府民政事務局前任局長，香港立法會前任議員，香港行政會議前任成員，沙田區議會前任議員、民建聯前任副主席，係民建聯中少數曾經擁有泛民主派背景嘅政治人。

屋企

劉江華祖籍廣東順德，而佢就響香港出世。

政治生涯

劉江華最初獲乙明邨互助委員會主席繆錦濤賞識佢嘅學歷，同時又係年輕文化人（中學教師），所以請佢做文書，所以劉江華喺1984年起出任明恩樓互委會秘書；之後喺1985年區議會選舉，街坊推舉劉伙拍青年中心幹事黃匡忠參選，劉江華自此開始從政。當年街坊同繆叔動用委員會嘅資源、中心會址，幫劉江華策劃整個競選，幫佢應酬交際，一直扶持。結果成功當選沙田區議員，直至2003年。

佢之後加入港同盟（民主黨前身），重響1991年立法局選舉夥伯黃匡忠代表港同盟參選，當時係行雙議席雙票制，佢係7號，拍檔黃匡忠係2號，競選口號就係「投2、7」；劉江華見到形勢危急（當時民調顯示，劉慧卿已經攞到議席，而劉江華同黃宏發喺票數上咬得好緊），拋出一句「咩7都好，唔好投2、7」，棄人保己，呼籲選民投「雙劉」（即劉慧卿同埋佢自己），之後唔止攞唔到議席，重俾港同盟紀律委員會紀律處分，劉江華憤而退黨，喺沙田另組公民力量（有「沙田執政黨」之稱），喺1994年香港區議會選舉，佢走去第二區選，改派林康華出選，同時佢嘅伯樂—繆錦濤亦為民主黨披甲出選，為咗要繆錦濤唔可以當選，對手就攻擊繆錦濤嘅先天性小兒麻痺，話「選邊個都得，唔好選個跛嘅」，結果繆錦濤輸畀公民力量林康華。而劉江華當選立法會、加入民建聯後，到繆錦濤嘅喪禮，劉江華都再冇返過乙明邨。

佢響1995年再參選立法局選舉，挑戰死敵劉慧卿，但都係輸。

1996年，佢循「推選委員會」選舉，晉身臨時立法會。1997年，民主黨嘅死對頭民建聯以取代張漢忠成為新界東名單第一位招攬佢加入，結果喺1998年選舉成為立法會議員，又響2000年成功連任。2003年，佢喺沙田區議會選舉中，以1,885票輸畀對手民主黨嘅何淑萍（2,163票），第一次失去沙田區議會議席。佢喺2004年以95,434票連任立法會議員，並帶領李國英入立法會。2005年6月，佢獲選為民建聯副主席。嚮2012年香港立法會選舉，佢參選區議會（第二）功能界別，但自己名單得票排第六，連任唔到立法會議員。

2012年12月，劉江華被委任做政制及內地事務局副局長。2015年7月21號接替曾德成做民政事務局局長。2017年過渡至林鄭月娥政府。

2020年4月22號畀國務院根據行政長官林鄭月娥嘅提名同建議免去局長職務，由勞工及福利局原副局長徐英偉接任；2021年9月，佢成為香港特别行政區選舉委員會基層社團委員。2023年1月，獲委任做第14屆全國政協香港委員。

個人榮譽

• 太平紳士（2003年）

出面網頁

• 劉江華喺Freebase嘅資料
• 〈香港特別行政區立法會 - 議員資料庫〉 (繁體中文)。香港特別行政區立法會。
• 顧問 | Advisors—會務顧問，民主建港協進聯盟